Dita Botërore e Informimit për Zhvillim: Pse ndërgjegjësimi publik është çelësi i përparimit global

Më shumë informim nënkupton më shumë ndërgjegjësim, më shumë përgjegjësi dhe më shumë përpjekje të përbashkëta drejt një të ardhmeje më të mirë. Çdo 24 Tetor shënohet Dita Botërore e Informacionit për Zhvillim. Një shtyllë kyçe e këtij procesi është orientimi dhe mobilizimi i opinionit publik, si në shtetet e zhvilluara ashtu edhe në ato në zhvillim, me qëllim mbështetjen e politikave dhe objektivave të përcaktuara. Autoritetet e vendeve më të përparuara duhet të shtojnë angazhimin e tyre për të rritur kuptimin e qytetarëve mbi natyrën e ndërvarur të zhvillimit, si dhe për të ndihmuar shtetet në zhvillim që të përshpejtojnë ecurinë e tyre ekonomike dhe sociale. Në të njëjtën linjë, qeveritë e vendeve në zhvillim kanë për detyrë të informojnë qytetarët në çdo shtresë të shoqërisë rreth sfidave dhe përfitimeve që sjell ky proces, duke siguruar një përfshirje aktive në arritjen e synimeve të përbashkëta. Mobilizimi i opinionit publik mbetet në radhë të parë detyrim i institucioneve kombëtare. Për të siguruar një orientim drejt zhvillimit që në sistemin arsimor, qeveritë mund të shqyrtojnë mundësinë e krijimit të strukturave të reja kombëtare ose fuqizimit të atyre ekzistuese si një strategji afatgjatë. Duke qenë se udhëheqja luan një rol vendimtar në sensibilizimin e opinionit publike, është e domosdoshme që autoritetet kompetente të përcaktojnë synime të qarta dhe konkrete. Nga ana e saj, Organizata e Kombeve të Bashkuara ka kontribuar vazhdimisht duke mbështetur mediat kombëtare, kryesisht përmes ofrimit të të dhënave bazë që u shërbejnë atyre si burim dhe frymëzim në punën e përditshme. Ishte viti 1972 kur Asambleja e Përgjithshme vendosi themelimin e kësaj dite, me synim që t'i tërheqë vëmendjen mbarë botës ndaj sfidave të zhvillimit dhe rëndësisë së bashkëpunimit ndërkombëtar. Kjo datë u caktua që të përkojë me Ditën e Kombeve të Bashkuara më 24 Tetor, që shënon gjithashtu përvjetorin e miratimit në vitin 1970 të Strategjisë Ndërkombëtare për Dekadën e Dytë të Zhvillimit të OKB-së. Sipas Kuvendit, një qasje më e mirë në shpërndarjen e informacionit dhe përfshirja e të rinjve do të sillte një ndërgjegjësim më të lartë rreth problemeve të zhvillimit, duke i dhënë një hov të ri bashkëpunimit global. Megjithatë, sukseset në këtë fushë varen ngushtë nga përmirësimi i klimës së përgjithshme ndërkombëtare, e cila kërkon hapa konkretë drejt barazisë politike, ekonomike, sociale dhe kulturore për çdo individ. Synimi kryesor i çdo nisme zhvillimore duhet të jetë rritja e qëndrueshme e mirëqenies njerëzore dhe shpërndarja e drejtë e përfitimeve për të gjithë. Nëse pabarazitë, privilegjet e pajustifikuara dhe padrejtësitë sociale vijojnë të ekistojnë, atëherë vetë kuptimi i zhvillimit humbet thelbin e tij. Komuniteti ndërkombëtar duhet t'i përgjigjet sfidave të kohës sonë, duke shfrytëzuar mundësitë e jashtëzakonshme që sjell shkenca dhe teknologjia, në mënyrë që frytet e tyre t'i gëzojnë të gjitha vendet dhe të ndihmojnë në rritjen ekonomike globale. Nga ana e tyre, shtetet në zhvillim duhet të vijojnë rritjen e buxheteve për kërkim dhe zhvillim, duke fuqizuar bashkëpunimin e ndërsjellë.