Nipi i Rexhep Selimit vishet me uniformën e FSK-së, reagon deputetja Shqipe Selimi

Forca e Sigurisë së Kosovës është pasuruar me një gjeneratë të ja re ushtarësh, ndër mes të cilëve spikat edhe një emër i njohur për opinionin publik. Arlind Selimi, nipi i Rexhep Selimit, ka zyrtarizuar angazhimin e tij në mbrojtje të vendit, pasi i është betuar sot flamurit si pjesë e strukturave të reja ushtarake. Lajmi është bërë i ditur nga deputetja e Lëvizjes Vetëvendosje, Shqipe Selimi, e cila përmes një njoftimi në rrjetet sociale ka ndarë emocionet e kësaj dite për familjen e tyre. Ajo ka vënë në dukje se Arlindi ishte pjesë e grupit prej 515 rekrutëve të rinj që iu bashkuan mbi 5,000 efektivëve aktivë të kësaj force. Sipas deputetes Selimi, përveç përfundimit me sukses të trajnimit, nipi i Rexhës është dalluar edhe për rezultate të shkëlqyera në aspektin akademik përgjatë përgatitjeve ushtarake, duke lënë pas një paraqitje që u ka dhënë atyre ndjenjën e krenarisë së thellë. Në mesazhin e saj të plotë drejtuar opinionit, ajo ka shkruar: "Sot, në ceremoninë e betimit të 515 rekrutëve të rinj, të cilët i bashkohen radhëve të mbi 5,000 ushtarëve të Forcës së Sigurisë së Kosovës, u betua edhe Arlind Selimi, nipi i Rexhës. Arlindi na bëri jashtëzakonisht krenarë, duke qenë njëri ndër kadetët me arritje të larta akademike, gjatë kohës së trajnimit." Në përmbyllje të urimit të saj, deputetja Selimi i ka kushtuar fjalë mirënjohjeje të gjithë ushtarëve të rinj, të cilët i ka quajtur me krenari pasardhës të Ushtrisë Çlirimtare të Kosovës. Ajo u ka uruar atyre shëndet, suksese dhe mbarësi në misionin e tyre fisnik në shërbim të atdheut, duke shprehur besimin se ata do të mbeten përgjithmonë faqebardhë dhe krenaria e familjeve dhe e gjithë Kosovës.