Dragash: Përfundon projekti i restaurimit për Mullirin dhe Valanicën historike në Bellobrad

Ministrja e Kulturës, Saranda Bogujevci, ka njoftuar se kanë përfunduar me sukses punimet për restaurimin e Valanicës dhe Mullirit në fshatin Bellobrad të komunës së Dragashit, duke i rikthyer këtij objekti rëndësinë e dikurshme. "Dy zeje tradicionale, nën të njëjtën çati", ka shkruar ajo në profilin e saj zyrtar në rrjetin social Facebook, duke ndarë lajmin me ndjekësit. Sipas të dhënave të bëra të ditura nga ministrja, ky aset i rëndësishëm kulturor daton që nga shekulli XIX dhe ndër vite ka pasur një funksion të dyfishtë: është shfrytëzuar si për bluarjen e drithërave (grurit e misrit), ashtu edhe për përpunimin e leshit që përdorej për prodhimin e veshjeve tradicionale. "I rrallë për mënyrën se si i bashkon këto dy veprimtari në një ndërtesë të vetme, ai mbetet një dëshmi e jetës dhe e mjeshtërisë së dikurshme në Opojë", ka vlerësuar ndër të tjera Bogujevci në shkrimin e saj. Në fund, ajo ka theksuar se ky investim dhe finalizimi i punimeve restauruese përbëjnë një hap tejet konkret dhe të rëndësishëm drejt mbrojtjes dhe promovimit të trashëgimisë kulturore të kësaj zone.