Osmani takon ambasadorin britanik: Partneriteti me Londrën, kyç për sigurinë dhe zhvillimin e vendit

Presidentja e Republikës së Kosovës, Vjosa Osmani, ka zhvilluar një takim pune me ambasadorin e Mbretërisë së Bashkuar në vend, Jonathan Hargreaves. Gjatë këtij takimi, kreu i shtetit ka vlerësuar lart rolin historik dhe aktual të Londonit zyrtar në mbështetje të Kosovës, duke theksuar se kjo aleancë mbetet shtyllë e rëndësishme për vendin. Përmes një publikimi në rrjetet sociale, Osmani ka vënë në dukje se ndihet krenare që gjatë ushtrimit të detyrës së saj presidenciale ka nisur zyrtarisht procesin e negociatave për një marrëveshje strategjike dypalëshe, e cila përfshin fushën e mbrojtjes dhe bashkëpunimin e ngushtë ekonomik me shtetin britanik. Sipas saj, bashkëpunimi i ngushtë me Mbretërinë e Bashkuar dhe partnerët e tjerë euroatlantikë është më shumë se kurrë i domosdoshëm përballë sfidave aktuale. Osmani shtoi se ky partneritet luan një rol kyç në konsolidimin e subjektivitetit ndërkombëtar të Kosovës, shtytjen përpara të agjendës zhvillimore dhe realizimin e synimeve legjitime të qytetarëve të saj.