Klasikja e madhe në “Loro Boriçi”, tekniku Laszlo: Synojmë vetëm triumfin dhe qetësinë në renditje

Trajneri i Vllaznisë, Csaba Laszlo, ka dalë në një konferencë për shtyp në prag të sfidës klasike kundër Tiranës, e cila do të zhvillohet nesër në orën 18:30, në stadiumin “Loro Boriçi”. “Kam drejtuar shumë ndeshje derbi në karrierën time, por kjo mbetet e jashtëzakonshme dhe me peshë të veçantë si për qytetin, ashtu edhe për grupin tonë”, u shpreh fillimisht numri një i stafit teknik shkodran. Sipas tij, objektivi kryesor mbetet konsolidimi i pozitave në klasifikim përmes arritjes së tri pikëve maksimale. Ai pranoi se në duele të tilla tensioni psikologjik është gjithmonë i lartë, ndaj detyra e tij kryesore është t'i orientojë këto emocione drejt një kanali pozitiv për skuadrën. “Duhet ta shfrytëzojmë këtë energji shtesë për të dëshmuar unitetin tonë dhe se kemi nxjerrë mësime nga ballafaqimet e kaluara. Ndaj Egnatias zhvilluam paraqitje të mirë, por na mungoi cinizmi para portës, gjë që lidhet ngushtë pikërisht me menaxhimin e emocioneve”, shtoi tekniku. Laszlo theksoi se përqendrimi maksimal dhe puna në shërbim të kolektivit do të jenë çelësi ndaj bardhebluve, ndërsa vuri theksin te rëndësia e ruajtjes së qetësisë për të mos çuar dëm rastet e krijuara. Duke analizuar kampionatin, ai u shpreh se diferencat mes ekipeve nuk janë të mëdha, ndaj shpesh është forma e ditës ose fati ai që përcakton fituesin, ndonëse fati meritohet përmes përkushtimit në fushë. “Çdo fitore na siguron oksigjenin e nevojshëm për të hedhur hapin e radhës. Kemi analizuar me kujdes kundërshtarin dhe kemi planifikuar gjithçka së bashku, por në fund janë lojtarët ata që duhet të shfaqin kreativitet dhe të marrin vendimet e duhura në fushë”, përfundoi trajneri Laszlo.