Gjenerata më e madhe në histori: 515 ushtarë të rinj i bashkohen Forcës së Sigurisë së Kosovës

Në ambientet e kazermës “Adem Jashari” në Prishtinë është organizuar ceremonia solemne e diplomimit të rekrutëve më të rinj të Forcës së Sigurisë së Kosovës (FSK). Kryeministri i vendit, Albin Kurti, gjatë fjalës së tij rasti theksoi se sot po japin betimin 515 ushtarë të rinj, duke shënuar kështu kontingjentin më të madh që ushtria e Kosovës ka pasur ndonjëherë në historinë e saj. “515 qytetarë të Republikës që kanë zgjedhur t’i shërbejnë atdheut. 515 pushkë më shumë për sigurinë e vendit. 515 garantues të rinj të lirisë dhe të paqes”, u shpreh ai në nisje të fjalimit. Duke iu drejtuar trupave të reja, shefi i ekzekutivit shtoi: “Të dashur ushtarë, rrugëtimin tuaj sot e filloni duke e ditur thellë në qenien tuaj që liria jonë është rezultat i përpjekjeve të shumë brezave, i atyre që dhanë gjithçka nga vetja e tyre për vendin tonë”. Kreu i Qeverisë vuri në dukje se Ushtria Çlirimtare e Kosovës (UÇK) ishte dhe mbetet simbol i qëndresës popullore për mosnënshtrim dhe refuzim të robërisë. Sipas tij, sakrifica e dëshmorëve dhe martirëve e obligon shoqërinë që të ruajë të vërtetën historike, të lartësojë luftën çlirimtare dhe të ndihet krenare kudo. “Nga malet e Drenicës, te Kullat e Dukagjinit, nga Drini i Bardhë te Ibri e Sitnica, nga Llapi e Gollaku te Anamorava e Karadaku – çdo krahinë e rajon, qytet e fshat, kodër e luginë, ruan kujtime të rezistencës dhe kryengritjes, të përpjekjeve për liri dhe të dashurisë për atdheun”, përfshiu në fjalën e tij Kurti. Ai gjithashtu nënvizoi se në këtë tokë liria përfaqëson historinë e familjeve, sakrificën ndërbrezore dhe një përgjegjësi të trashëguar. Duke e cilësuar ushtrinë si një ndër shtyllat kryesore shtetërore, kryeministri bëri të ditur se fuqizimi i saj përbën një detyrim institucional për të garantuar sigurinë e qytetarëve, për të mbrojtur sovranitetin dhe integritetin territorial të Republikës në përputhje me mandatin ligjor dhe kushtetues. Në këtë drejtim, ai u zotua se qeveria do të investojë mbi 1 miliard euro në ushtri.