Kurti takon presidenten e BERZH-it në Mal të Zi: Në fokus investimet strategjike dhe zhvillimi ekonomik i vendit

Kryeministri i Republikës së Kosovës, Albin Kurti, ka zhvilluar një takim me presidenten e Bankës Evropiane për Rindërtim dhe Zhvillim (BERZH), Odile Renaud-Basso, në kuadër të Samitit të Procesit të Berlinit që po mbahet në Shën Stefan të Malit të Zi. Gjatë këtij takimi, dy udhëheqësit kanë vijuar bisedimet e nisura në muajin prill në Londër, me fokus të veçantë te thellimi i bashkëpunimit dypalësh dhe realizimi i nismave të rëndësishme në fushën e ekonomisë dhe infrastrukturës në Kosovë. Sipas njoftimit të Zyrës së Kryeministrit, kreu i ekzekutivit kosovar ka theksuar se gjatë këtij mandati të ri, synimi kryesor është që bashkëpunimi për investime të harmonizohet me prioritetet strategjike të vendit, duke përfshirë sigurinë energjetike dhe të ujit, sektorin e mbrojtjes, transportin e gjelbër e të qëndrueshëm, si dhe zhvillimin e infrastrukturës. Ai gjithashtu vlerësoi se BERZH-i vazhdon të jetë një aleat kyç në procesin e integrimit evropian të Kosovës. Prej kohës së anëtarësimit të Kosovës në këtë institucion financiar në vitin 2012, BERZH-i ka siguruar mbështetje financiare në vlerë prej rreth 967 milionë eurosh, duke financuar gjithsej 151 projekte të shtrira si në sferën publike ashtu edhe në atë private.