Skandal në atletikë: Kampionja olimpike Peres Jepchirchir pezullohet për doping

Një tjetër goditje e rëndë ka tronditur themelet e atletikës keniane, pasi një nga emrat më të lakuar të këtij sporti është vënë në qendër të një skandali dopingu. Bëhet fjalë për atleten e njohur të garave të gjata, Peres Jepchirchir, e cila mban titullin e kampiones olimpike në maratonë nga Lojërat “Tokio 2020”, si dhe atë të kampiones botërore. Ajo është pezulluar zyrtarisht nga Njësia e Integritetit të Atletikës (AUI), pasi ka dalë pozitive në një test të papritur dopingu, i cili u krye pak para triumfit të saj të fundit në Maratonën e Sidneit. Sportistja nga Kenia, e cila krenohet me fitoren e katër maratonave më prestigjoze në botë – Nju Jork, Boston, Londër dhe Sidnei – ka rezultuar pozitive në substancën e ndaluar EPO. Ky fakt ka sjellë menjëherë masën e pezullimit ndaj saj. Megjithatë, rregullorja i jep të drejtën 33-vjeçares që të apelojë vendimin e marrë, duke kërkuar hapjen dhe analizimin e epruvetës B për të vërtetuar pafajësinë e saj. Para këtij zhvillimi, paraqitja e fundit e atletes keniane ishte pikërisht në Sidnei, ku ajo u shpall fituese duke regjistruar një kohë prej 2:18:31. Ajo pati një dominim absolut, duke lënë pas me afro katër minuta ndjekësen e saj më të afërt, bashkatdhetaren Irene Chepet Cheptei, e cila e mbylli garën me kohën 2:22:11.