Sulmuesi brazilian synon rikthimin te Juventusi: Tani jam më i pjekur dhe i gatshëm për Italinë

Sulmuesi brazilian Caio Jorge ka shfaqur hapur ambicien e tij për të veshur sërish fanellën e Juventusit, duke u shprehur se tashmë posedon pjekurinë dhe përgatitjen e duhur për të lënë gjurmë në elitën e futbollit italian. Pas një ecurie fantastike me skuadrën e Cruzeiros, 24-vjeçari synon një kapitull të dytë te “Zonja e Vjetër”, për të treguar vlerat e tij të vërteta në Torino. Forma e tij sportive ka qenë në nivele të larta. Gjatë edicionit të kaluar, ai arriti të tundë rrjetën 21 herë në 33 ndeshje, ndërsa në sezonin aktual ka regjistruar 11 gola në 24 paraqitje. Këto shifra të spikatura kanë bërë që emri i tij të lidhet sërish me një kalim të mundshëm në Serie A. Në një prononcim për emisionin “Cronache di Spogliatoio”, Caio Jorge është kthyer pas në kohë, duke evokuar muajt e tij të parë në radhët e bardhezinjve. “Në pesë muajt e parë te Juventusi pata shumë pak hapësirë në fushë. Mendoja se do të merrja të paktën 20 minuta lojë në çdo takim, aq më tepër që stërvitesha fort gjatë gjithë javës dhe shënoja në miqësore. Megjithatë, dëmtimi i rëndë ndryshoi rrjedhën e gjërave për mua në atë klub”, u shpreh ai. Ai shtoi se ndjehet plotësisht i gatshëm për një rikthim në gadishullin Apenin dhe synon pikërisht skuadrën nga Torino. “Kam bindjen se tani mund të jap shumë më tepër. Dëshiroj me çdo kusht të kthehem në Itali, pasi e njoh kulturën, flas gjuhën dhe e adhuroj atë kampionat, megjithëse kur mbërrita atje isha ende shumë i ri”, u shpreh sulmuesi. Në përmbyllje, Caio Jorge vuri theksin te mirënjohja e thellë për klubin italian, duke kujtuar mbështetjen e madhe që i kanë dhënë gjatë fazës së vështirë të dëmtimit dhe mundësinë që i ofruan për të nisur aventurën e tij evropiane.