Skandal në tenderët mbi gjysmë milion euro: Aktakuzë për falsifikim dokumentesh në Ministrinë e Shëndetësisë

Prokuroria Themelore në Prishtinë ka ndërmarrë hapa ligjorë duke ngritur aktakuzë ndaj një personi fizik me inicialet J.P., si dhe ndaj një subjekti juridik, nën dyshimin e bazuar për përfshirje në veprën penale të mashtrimit dhe keqpërdorimit në procedurat e prokurimit publik. Përmes një njoftimi zyrtar nga Departamenti për Krime të Rënda, bëhet e ditur se çështja lidhet me shkeljet e pretenduara ligjore sipas nenit 415, paragrafi 1 të Kodit Penal të Republikës së Kosovës, ku i pandehuri akuzohet se ka vepruar në dëm të rregullave të konkurrencës së hapur. Sipas dokumentit të prokurorisë, ngjarja daton më 19 janar të vitit 2024, periudhë gjatë së cilës J.P., në cilësinë e drejtorit dhe përfaqësuesit të autorizuar të kompanisë ‘’M… P.. ‘’ SH.P.K., kishte dorëzuar ofertën në emër të këtij operatori për aktivitetin e tenderimit të shpallur nga Ministria e Shëndetësisë, i cili kishte për qëllim furnizimin me materiale shpenzuese mjekësore që përfshihen në Listën Esenciale. Bëhet fjalë për dy pjesë të këtij aktiviteti ekonomik, respektivisht për Lotin 1 në vlerë prej 344.955.77 eurosh dhe për Lotin 3 në vlerë prej 169.012.36 eurosh, shuma këto që së bashku kalojnë shifrën e gjysmë milioni eurosh. Në bazë të hetimeve, në dosjen e tenderit ishte përfshirë certifikata ISO 13485:20216 me numër 47014, e cila fillimisht ishte lëshuar nga organi certifikues ‘’NQA’’ për kompaninë prodhuese ‘’Forlong Medical Co., Ltd’’ nga Kina, si dëshmi për të përmbushur kriteret teknike dhe profesionale të kërkuara nga institucioni kontraktues. Megjithatë, hetimet zbuluan se ky dokument kishte humbur vlefshmërinë dhe ishte anuluar zyrtarisht që në tetor të vitit 2022. Për më tepër, ekzistojnë dyshime të forta se data e skadimit në certifikatë ishte ndryshuar në mënyrë të kundërligjshme nga 18 tetori i vitit 2022 në 18 tetor 2024. Sipas organit të akuzës, ky veprim është ndërmarrë me dashje për të manipuluar autoritetin kontraktues, me qëllim që të dëshmohet rrejshëm plotësimi i kushteve dhe të ndikohet në vendimmarrjen për ndarjen e kontratës në favor të kompanisë së pandehur. Në përfundim të hetimeve, prokurori i çështjes i ka kërkuar Gjykatës kompetente që, pas shqyrtimit të provave në seancë gjyqësore, t'i shpallë fajtorë të pandehurit, t'i dënojë sipas dispozitave ligjore në fuqi dhe t'u shqiptojë masën ndëshkuese të ndalimit të pjesëmarrjes në çdo procedurë të ardhshme të prokurimit publik.