Mesut Ozil akuzon ashpër FIFA-n për standarde të dyfishta ndaj Rusisë dhe Izraelit

Ish-mesfushori i kombëtares gjermane, Mesut Ozil, ka shprehur pakënaqësinë e tij të hapur ndaj shtëpisë më të madhe të futbollit botëror, FIFA, duke e akuzuar për qasje të ndryshme ndaj ekipeve ruse dhe atyre izraelite. Këto deklarata Ozil i bëri gjatë mbrëmjes së të enjtes, pas një ndeshjeje miqësore mes veteranëve të Başakşehir-it dhe skuadrës ruse Zenit, e cila u zhvillua në Stamboll në kuadër të Forumit Ekonomik Euroaziatik të Veronës. Gjatë këtij takimi, ai qëndroi në tribunë së bashku me presidentin e klubit turk, Goksel Gumusdag, trajnerin Nuri Sahin dhe ish-zëvendëspresidentin Mustafa Erogut. “Komuniteti sportiv gjithmonë i ka bashkuar njerëzit. FIFA nuk ka vendosur embargo ndaj ekipeve izraelite gjatë kësaj periudhe, por ka vendosur embargo ndaj ekipeve ruse. Nga këtu, dua t’i them FIFA-s të lërë mënjanë këto standarde të dyfishta dhe t’i trajtojë të gjithë në mënyrë të barabartë”, u shpreh Ozil. Një qëndrim të ngjashëm ndau edhe kreu i klubit turk, Goksel Gumusdag, i cili bëri thirrje për transparencë dhe drejtësi më të madhe në sportin global. “Këtu ka standarde të dyfishta. E gjithë bota e sheh këtë. Nuk është e drejtë që sanksionet të zbatohen ndaj Rusisë dhe jo ndaj Izraelit, në futboll dhe në të gjitha sportet. FIFA dhe UEFA duhet të tregojnë një qëndrim të drejtë”, tha Gumusdag, duke shtuar se shpreson që klubet ruse t'i rikthehen sa më parë garave ndërkombëtare. Kujtojmë se ekipet përfaqësuese dhe ato ruse u pezulluan nga aktivitetet e FIFA-s dhe UEFA-s në vitin 2022, si pasojë e nisjes së luftës në Ukrainë. Nga ana tjetër, Izraeli vazhdon rregullisht të marrë pjesë në garat ndërkombëtare, një situatë që më herët ka ngjallur reagime dhe kritika të ngjashme edhe nga figura të tjera të njohura të futbollit, si ish-sulmuesi francez Eric Cantona, i cili pati kërkuar publikisht pezullimin e këtij shteti. Mesut Ozil i dha fund karrierës së tij si futbollist profesionist në muajin mars të vitit 2023 pikërisht te skuadra e Başakşehir-it, ndërsa pak kohë më vonë iu bashkua skenës politike duke u bërë anëtar i Komitetit Qendror të partisë në pushtet në Turqi, AKP.