Gashi uron 23 Tetorin: E ardhmja ndërtohet përmes unitetit dhe respektimit të diversitetit

Kryetari i Kuvendit, Afrim Gashi, u ka drejtuar një mesazh urimi të gjithë qytetarëve me rastin e 23 Tetorit, Ditës së Luftës Revolucionare Maqedonase. Përmes një postimi në platformat e tij zyrtare në rrjetet sociale, kreu i Kuvendit ka vlerësuar se kjo datë historike shërben si një pikë referimi për të nderuar sakrificën e gjeneratave të kaluara dhe për të përtërirë angazhimin kolektiv drejt një të ardhmeje më të mirë. "Me rastin e 23 Tetorit – Ditës së Luftës Revolucionare Maqedonase, përcjell urimet e mia të sinqerta për të gjithë qytetarët e Republikës së Maqedonisë së Veriut. Kjo datë e rëndësishme na kujton qëndrueshmërinë, guximin dhe përpjekjet e brezave para nesh për liri, dinjitet dhe shtetësi të pavarur. Lufta dhe sakrifica e tyre përbëjnë një pjesë të rëndësishme të themelit historik mbi të cilin sot ndërtojmë të ardhmen tonë të përbashkët", ka theksuar Gashi në mesazhin e tij. Ndër të tjera, ai ka vënë theksin te rëndësia e bashkëpunimit dhe e vlerave demokratike, duke shtuar se shënimi i kësaj feste është një mundësi për të kujtuar me respekt të kaluarën, por edhe për të riafirmuar përgjegjësinë tonë të përbashkët për ndërtimin e një shoqërie demokratike, të qëndrueshme dhe të begatë, të mbështetur në respektin e ndërsjellë, unitetin dhe vlerat evropiane. Në mbyllje të urimit të tij, Gashi ka përcjellë mesazhin se vetëm të bashkuar rreth interesave të përbashkëta dhe duke respektuar dallimet, mund të ndërtojmë një shtet ku çdo qytetar të ndihet i barabartë, i sigurt dhe i respektuar.