Udhëtoi me taksi nga Tirana për të shpërndarë kokainë në Mamurras, dështon plani i 31-vjeçarit

Një operacion antidrogë i ndërmarrë nga strukturat policore ka çuar në pranga një 31-vjeçar, i cili u kap në flagrancë teksa tentonte të transportonte lëndë narkotike të llojit kokainë nga kryeqyteti drejt Mamurrasit me qëllim shitjen. Goditja u finalizua me sukses në kuadër të operacionit të koduar “Destinacioni”. Ajo u organizua dhe u realizua nga Seksioni për Hetimin e Narkotikëve, në bashkëngjitje me Seksionin për Mbështetjen Operacionale të Hetimit. Në pranga ra i riu Salvador Sula, 31 vjeç, me origjinë nga Saranda dhe banues në Tiranë. Pas sigurimit të informacioneve operative mbi aktivitetin e paligjshëm të transportit të lëndës narkotike, efektivët e policisë organizuan ndërhyrjen, duke bërë të mundur bllokimin e automjetit taksi përgjatë aksit të vjetër rrugor Mamurras-Thumanë, konkretisht në nyjën lidhëse të Fushë-Mamurrasit. Gjatë kontrollit fizik dhe të mjetit, shërbimet e rendit zbuluan dhe sekuestruan në cilësinë e provës materiale 126 doza të mbushura me lëndë të dyshuar narkotike kokainë, pesha totale e së cilës kapte shifrën e rreth 109 gramëve. Ndërkohë, dokumentacioni procedurale i çështjes i është përcjellë Prokurorisë pranë Gjykatës së Shkallës së Parë të Juridiksionit të Përgjithshëm, ku i ndaluari do të përballet me akuzën për veprën penale “Prodhimi dhe shitja e narkotikëve”.