Talenti me origjinë shqiptare pushton mediat amerikane: CNN i dedikon hapësirë të veçantë Adri Mehmetit

Giganti mediatik amerikan, CNN, i ka kushtuar një artikull të posaçëm futbollistit me prejardhje shqiptare, Adri Mehmeti, i cili po spikat fuqishëm në skenën e futbollit në Shtetet e Bashkuara të Amerikës. Edhe pse vetëm 17 vjeç, ai ka siguruar një vend si titullar te skuadra e njohur New York Red Bulls, ndërsa së fundmi ka regjistruar edhe paraqitjen e tij të parë me fanellën e kombëtares A të SHBA-së. "Të dy prindërit e tij vijnë nga Shqipëria, një shtet ku futbolli trajtohet si një fe e dytë. Edhe babai i tij ka qenë futbollist në rini, duke mbrojtur ngjyrat e vendit në grupmoshat e reja", shkruan ndër të tjera CNN në shkrimin e tij. Vetë futbollisti ka ndarë detaje nga fillimet e tij: "Kam nisur të luaj me topin krah babait tim kur isha vetëm dy vjeç. Duke u argëtuar përditë në oborr, u dashurova përfundimisht me këtë sport", ka rrëfyer Mehmeti. Karriera e tij mori hov kur iu bashkua akademisë së New York Red Bulls në vitin 2019. Më pas, në muajin shkurt ai bëri debutimin me ekipin e parë, ndërsa në prill realizoi edhe golin e tij debutues në MLS. "Forma e tij e shkëlqyer bindi trajnerin Mauricio Pochettino që ta ftojë në radhët e kombëtares amerikane. Mehmeti regjistroi paraqitjen e tij të parë në shtator, gjatë fitores 4:1 kundër Perusë, duke u aktivizuar në minutën e 88-të", vijon më tej artikulli. Vlen të ceket se më parë ai ka përfaqësuar Shqipërinë në kategoritë e moshave të reja, përpara se të hidhte hapin e madh drejt kombëtares së parë të SHBA-së. Në rrafshin personal, Mehmeti ka treguar se idhujt e tij në fushën e gjelbër janë Rodri dhe Pedri, kurse së fundmi ndjek me vëmendje edhe lojën e Elliot Anderson. Tashmë, sipas pasqyrës së bërë nga CNN, Mehmeti bën pjesë në valën e re të talenteve që pritet të mbajnë peshë të madhe në të ardhmen e kombëtares amerikane të futbollit.