Kthimi i Ligjit për Specialen në Kuvend, Haziri paralajmëron: Askush nuk guxon të luajë me kauzën e UÇK-së

Çlirim Haziri, organizator i protestave “Jo në emrin tim”, ka dalë me një reagim zyrtar pas rikthimit të Ligjit për Gjykatën Speciale në procedurat parlamentare të Kuvendit të Kosovës. Përmes një postimi në rrjetet sociale, Haziri vuri anash zërat dhe akuzat e shumta që kanë shoqëruar këtë zhvillim të fundit institucional, duke rikujtuar se synimi kryesor i protestave ka qenë angazhimi i shtetit për mbrojtjen e të drejtave të ish-krerëve të Ushtrisë Çlirimtare të Kosovës që po përballen me drejtësinë në Hagë. “Po shoh shumë reagime e akuza pas kthimit të ligjit në Kuvend, prandaj dua ta sqaroj edhe një herë qëndrimin tonë. Për 21 ditë e 21 net kemi qëndruar në shesh me një kërkesë të vetme: që institucionet tona të marrin përgjegjësi për mbrojtjen e të drejtave të ish-udhëheqësve të UÇK-së në Hagë. Kemi protestuar për një kauzë që është shumë më e madhe se secili prej nesh”, ka shkruar ai. Sipas tij, nismëtarët e kësaj kauze do të ndjekin me vëmendje maksimale çdo procedurë deri në amandamentimin dhe miratimin përfundimtar të këtij akti ligjor, duke mbajtur nën vëzhgim zbatimin e çdo dispozite. “Ne vetë kemi kërkuar që, nëse ka diçka në ligj që duhet ndryshuar apo përmirësuar, kjo të bëhet. Sepse ne nuk kemi kërkuar kurrë një ligj sa për ta votuar, por një ligj që qëndron juridikisht dhe që mund të ketë efekt real. Për ne nuk ka rëndësi kush e propozon apo kush e voton. Ka rëndësi çfarë përmban ligji dhe çfarë mund të bëjë ai. Do të vazhdojmë ta përcjellim me shumë kujdes çdo hap deri në përmirësimin dhe votimin e ligjit”, ka theksuar Haziri. Në përmbyllje të reagimit të tij, ai ka dërguar një mesazh të qartë politik dhe institucional se çdo tentativë për të minimizuar apo keqpërdorur vlerat e luftës do të gjejë kundërshtim të rreptë nga qytetarët. “Do të vazhdojmë ta monitorojmë edhe zbatimin e çdo neni e çdo shkronje. Nuk besoj se dikush do të tentojë të luajë me UÇK-në dhe me këtë kauzë. Por kushdo që mendon se mund ta bëjë këtë, duhet ta dijë se do ta ketë përballë. Qëndrimi ynë nuk ka ndryshuar. Kërkesa jonë nuk ka ndryshuar. Kauza jonë nuk ka ndryshuar. Për UÇK-në kemi qëndruar bashkë dhe për UÇK-në do të vazhdojmë të qëndrojmë”, ka përfunduar ai.