Çlirim Haziri lëshon paralajmërimin e rreptë pas rikthimit të Ligjit për Specialen në Kuvend

Organizatori i protestave “Jo në emrin tim”, Çlirim Haziri, ka reaguar ashpër pas rikthimit të Ligjit për Dhomat e Specializuara në Kuvendin e Kosovës. Ai ka kujtuar se qëllimi kryesor i tubimeve ka qenë që institucionet shtetërore të angazhohen seriozisht për mbrojtjen e të drejtave të ish-krerëve të Ushtrisë Çlirimtare të Kosovës, të cilët poballafaktohen me gjykim në Hagë. Nëpërmjet një deklarate në rrjetet sociale, Haziri ka bërë të ditur se ky zhvillim është shoqëruar me një valë reagimesh dhe akuzash, ndërkohë që ka sjellë në vëmendje sakrificën e protestuesve që qëndruan për tri javë radhazi, plot 21 ditë e 21 net, në shesh për këtë kauzë të shenjtë. Ai ka bërë të ditur se do ta ndjekin me vëmendje të jashtëzakonshme çdo hap të procedurave për ndryshimin dhe miratimin e këtij ligji. Sipas tij, fokusi i tyre mbetet te përmbajtja substanciale dhe fuqia juridike e dokumentit, duke shmangur çdo interesim se kush mund të jetë propozuesi apo votuesi i tij. “Ne nuk kemi kërkuar kurrë një ligj sa për ta votuar, por një ligj që qëndron juridikisht dhe që mund të ketë efekt real. Për ne nuk ka rëndësi kush e propozon apo kush e voton. Ka rëndësi çfarë përmban ligji dhe çfarë mund të bëjë ai”, ka shkruar Haziri në postimin e tij. Në fund, ai ka lëshuar një mesazh të qartë se do të mbajnë nën mbikëqyrje zbatimin e çdo neni të veçantë, duke shtuar se nuk do të lejojnë që askush të tallet ose të përdorë padrejtësisht vlerat e UÇK-së dhe idealet për të cilat ata protestuan. “Kushdo që mendon se mund ta bëjë këtë, duhet ta dijë se do ta ketë përballë. Qëndrimi ynë nuk ka ndryshuar. Kërkesa jonë nuk ka ndryshuar. Kauza jonë nuk ka ndryshuar. Për UÇK-në kemi qëndruar bashkë dhe për UÇK-në do të vazhdojmë të qëndrojmë”, ka përfunduar Haziri.