Nisje e mbarë për Kosovën U16, vajzat e hendbollit mposhtin Bullgarinë në Ligën Rajonale

Përfaqësuesja e Kosovës U16 në hendboll (vajza) ka debutuar në mënyrë perfekte në edicionin e ri të Ligës Rajonale, duke u treguar e suksesshme në turneun U16 Regional Challenge Cup. Të enjten në mbrëmje, parketi i Pallatit të Rinisë dhe Sporteve në Prishtinë ishte dëshmitar i një ndeshjeje të zjarrtë, ku talentet e vendit tonë arritën të triumfojnë me rezultatin 26:23 kundër bashkëmoshatareve nga Bulgaria. Përballja prodhoi një lojë të fortë dhe rivalitet të lartë në çdo cep të fushës, por ishin hendbollistet tona ato që treguan gjakftohtësi dhe cilësi më të lartë në çastet më delikate të takimit. Në aspektin individual, Natyra Arifi udhëhoqi repartin ofensiv duke u shpallur më e dalluara me gjashtë gola të realizuar, e ndjekur nga Jusra Begu me pesë dhe Samanda Konjuhaj me katër finalizime të suksesshme. Një kontribut vendimtar në këtë fitore dha edhe portierja Melisa Sefa, e cila bëri 12 pritje fantastike gjatë lojës, duke përfshirë edhe neutralizimin e katër gjuajtjeve nga pika e penalltisë. Sipas kalendarit të turneut, aksioni do të vazhdojë të premten me duelin mes Rumanisë dhe Bullgarisë, i cili do të nisë në orën 13:00. Ndërkaq, sfida e radhës dhe shumë e rëndësishme për Përfaqësuesen e Kosovës do të zhvillohet të shtunën, ku vajzat tona do të matin forcat me Rumaninë, me fillim nga ora 10:00.