Procesi i Berlinit / Kurti bisedon me ministrin irlandez për integrimin evropian dhe hapat e ardhshëm të Kosovës

Kryeministri i Republikës së Kosovës, Albin Kurti, ka zhvilluar një takim bilateral me ministrin e Shtetit të Irlandës për Çështjet Evropiane dhe Mbrojtjen, Thomas Byrne. Takimi u realizua në kuadër të Samitit të Liderëve të Procesit të Berlinit, i cili po zhvillimet punimet e tij në Mal të Zi. Gjatë këtij bashkëbisedimi, kreu i ekzekutivit kosovar i ka përcjellë një falënderim të sinqertë homologut irlandez për mbështetjen e palëkundur që Dublin-i zyrtar i ka dhënë vazhdimisht Kosovës. Ai gjithashtu ka vlerësuar lart kontributin e dhënë në fushën e sigurisë përmes pranisë së trupave ushtarake në kuadër të misionit të KFOR-it. Në këtë kontekst, shefi i qeverisë ka përmendur shifrat domethënëse të bashkëpunimit ndërnjerëzor dhe ushtarak, duke theksuar se mbi 3,000 pjesëtarë të ushtrisë irlandeze kanë shërbyer në Kosovë që nga viti 1999. Po ashtu, ai ka kujtuar se më shumë se 1,000 refugjatë shqiptarë të prekur nga lufta kishin gjetur strehim dhe mikpritje në Irlandë gjatë periudhës së konfliktit. Temë qendrore e diskutimit ka qenë edhe perspektiva evropiane e Kosovës dhe procesi i anëtarësimit në Bashkimin Evropian. Kurti ka vënë theksin te domosdoshmëria që të arriturat dhe progresi demokratik i shënuar në vend të gjejnë reflektim në hapa konkretë drejt integrimit të plotë në BE. Në fund të takimit, kryeministri ka veçuar rëndësinë e muajit nëntor, muaj gjatë të cilit pritet të bëhet publik Raporti i rregullt i Komisionit Evropian për ecurinë e Kosovës.