Humbje e rëndë në shtëpi për Dinamon e Zagrebit, Arbër Hoxha luan titullar në Ligën e Evropës

Pavarësisht se u aktivizua nga minuta e parë, sulmuesi Arbër Hoxha nuk mundi ta ndihmonte Dinamon e Zagrebit të shmangte një disfatë zhgënjyese para tifozëve të saj, pasi skuadra kroate u mposht me rezultatin 4:2 nga NEC Nijmegen, në kuadër të xhiros së tretë të Ligës së Evropës. Kjo përballje mes gjigandit kroat dhe atij holandez dhuroi një spektakël me kthesa të njëpasnjëshme në rezultat, ku shifrat kaluan nga 0:1 në 2:1, për t'u transformuar më pas në 2:3 dhe përfundimisht në 2:4. Pjesa e parë e ndeshjes solli emocione të mëdha, ku mysafirët zhbllokuan rezultatin në minutën e 25-të përmes Bischoff. Megjithatë, reagimi i vendasve ishte i menjëhershëm me anë të Beljos, i cili shënoi dy herë radhazi në minutën e 33-të dhe të 37-të, duke e përmbysur përkohësisht epërsinë në 2:1. Por skuadra holandeze tregoi karakter të fortë në fushë, duke barazuar me Linssen në minutën e 45-të, i cili sërish realizoi në minutën e 54-t për të rikthyer epërsinë e mysafirëve. Epilogun përfundimtar të ndeshjes dhe fitoren 2:4 e vulosi Chery me golin e tij në minutën e 80-të. Sa i përket paraqitjes individuale, futbollisti nga Kosova që mbron ngjyrat e Kombëtares së Shqipërisë, Arbër Hoxha, e nisi takimin nga minuta e parë, ndërsa u largua nga fusha e lojës në minutën e 67-të përmes zëvendësimit. Pas këtij takimi, Dinamo e Zagrebit pozicionohet në vendin e 15-të me gjithsej katër pikë, aq sa ka grumbulluar edhe ekipi i Nijmegenit, i cili renditet dy pozita më poshtë në tabelë.