Turneu UEFA Development / Shqipëria U-15 e vajzave pëson humbje të thellë ndaj Rumanisë

Kombëtarja e Shqipërisë U-15 për vajza ka zhvilluar ndeshjen e saj të dytë në kuadër të turneut ndërkombëtar “UEFA Development Women’s U15 Tournament”, ku është mposhtur nga bashkëmoshataret e Rumanisë me shifrat 2-12. Për këtë përballje, trajnerja Rabie Tota hodhi në fushë nga minuta e parë formacionin e përbërë nga Grea Tula, Enxhi Xhyra, Rajla Grembi, Hera Guda, Klea Selmani, kapitenja Rukena Demushi, Perla Kallanxhi, Estela Gjoni, Glorja Kupe, Anila Sherri dhe Amelia Simaku. Sfida pati një nisje të pafavorshme për kuqezijtë, pasi Rumania arriti të zhbllokojë shifrat që në minutën e tretë përmes Daria Simion. Pavarësisht përpjekjeve të herëpashershme nga ana e vajzave shqiptare për të reaguar dhe për të ndryshuar dinamikën e lojës, rezultati mbeti i pandryshuar në pjesën e parë. Me fillimin e fraksionit të dytë, rumunet realizuan edhe golin e dytë me anë të Szekely, ndërkohë që misioni i Shqipërisë u vështirësua ndjeshëm pas ndëshkimit me karton të kuq të Shoshës. Megjithatë, edhe pse u gjendën në inferioritet numerik, vajzat kuqezi treguan karakter duke ngushtuar diferencën falë një goli të shënuar nga Amelia Simaku. Përballë kësaj situate, Rumania shfrytëzoi epërsinë në fushë dhe shënoi golin e tretë nëpërmjet Suteu. Lëvizjet nga stoli i rezervave rezultuan vendimtare për përfaqësuesen rumune, ku Crăciunaș realizoi një herë dhe Baidoc kontribuoi me dy gola, duke e thelluar më tej avantazhin. Ndërkohë, një paraqitje të jashtëzakonshme pati Barbu, e cila shkoi pesë herë në listën e golashënueseve. Për Shqipërinë shënoi gjithashtu Estela Gjoni, por sfida u mbyll përfundimisht me rezultatin 2-12 në favor të Rumanisë. Në takimin tjetër të këtij turneu, Letonia dhe Irlanda e Veriut u ndanë në barazim 1-1. Veprimtaria do të uli siparin ditën e diel, ku Rumania do të matë forcat me Letoninë për trofeun e vendit të parë, ndërsa Shqipëria do të kërkojë suksesin e radhës ndaj Irlandës së Veriut.