Humbje e rëndë për Dinamo Zagrebin e Arbër Hoxhës në Ligën e Evropës, festojnë holandezët e Nijmegen

Futbollisti i Kombëtarja shqiptare, Arbër Hoxha, ishte pjesë e formacionit startues për Dinamo Zagrebin, por skuadra kroate ka dështuar para shikuesve të saj, duke u mposhtur me rezultat 4:2 nga NEC Nijmegen, në kuadër të xhiros së tretë të Ligës së Evropës. Kjo përballje mes klubit kroat dhe atij holandez dhuroi një lojë tejet dinamike me disa kthesa dramatike të rezultatit, ku shifrat kaluan nga 0:1 në 2:1, për t'u shndërruar më pas në 2:3 dhe përfundimisht në 2:4. Mysafirët nga Holanda zhbllokuan rezultatin në minutën e 25-të përmes Bischoffit, mirëpo vendasit reaguan shpejt me anë të Beljos, i cili shënoi dy herë radhazi, në minutën e 33-të dhe të 37-të, duke e përmbysur epërsinë në 2:1 në favor të Dinamos. Megjithatë, skuadra e Nijmegenit nuk u dorëzua dhe barazoi shifrat me golin e Linssen në minutën e 45-të, i cili përsëri shënoi në minutën e 54-t për të rikthyer epërsinë e mysafirëve. Përfundimisht, fitorja 2:4 u vulos nga Chery, i cili realizoi në minutën e 80-të të ndeshjes. Sa i përket paraqitjes së sulmuesit nga Kosova, Arbër Hoxha, ai qëndroi në fushë deri në minutën e 67-të, kur u zëvendësua nga staf teknik, pasi e nisi sfidën si titullar për gjigantin nga Zagrebi. Pas këtij takimi, Dinamo Zagrebi pozicionohet në vendin e 15-të të klasifikimit me katër pikë të grumbulluara, aq sa ka edhe Nijmegen, e cila pozicionohet dy shkallë më poshtë në tabelë.