Realitet i ri te Manchester United, Bruno Fernandes: Nuk jemi më skuadra e dikurshme

Kapiteni i Manchester United, Bruno Fernandes, ka përcjellë një mesazh të qartë dhe realist lidhur me situatën aktuale në klub, duke kërkuar vetëdijesim të plotë nga të gjithë. Mesfushori portugez ka theksuar se ekipi duhet të heqë dorë nga krahasimet me të kaluarën dhe të pranojë realitetin e ri të skuadrës. “Te ky klub ka shumë përqendrim te ajo që është arritur në të kaluarën… por realiteti është se ne nuk jemi më ata njerëz që ishim dikur”, është shprehur Fernandesi. Ai ka shtuar se ky ndryshim konteksti duhet të kuptohet qartë si nga institucioni ashtu edhe nga vetë futbollistët. “Klubi dhe lojtarët duhet ta kuptojnë këtë”, deklaroi ai gjatë një interviste për mediat. Në fjalën e tij, kapiteni i “Djajve të Kuq” u ndal edhe te presioni i madh që shoqëron fanellën e kësaj skuadre. “Fatkeqësisht, sidomos për lojtarët që vijnë këtu, pritshmëritë janë të fitojnë trofe, ndeshje dhe të arrijnë nivelin më të lartë. Por vitet e fundit, kjo ka qenë shumë e vështirë për këtë klub. Ky është realiteti”, përfundoi ai.