Ultimatumi i Bekim Haxhiut: Kërkon dorëheqjen e menjëhershme të kryesisë së PDK-së deri në mesnatë

Ish-deputeti i Partisë Demokratike të Kosovës, Bekim Haxhiu, ka ngritur një kërkesë të fortë politike duke kërkuar largimin e menjëhershëm të të gjithë anëtarëve të kryesisë së kësaj partie, pas zhvillimeve të fundit që lidhen me Ligjin për Dhomat e Specializuara. Nëpërmjet një reagimi në rrjetet sociale, Haxhiu ka përcaktuar një afat kohor, duke kërkuar që dorëheqjet të zyrtarizohen brenda mbrëmjes së sotme, më së voni deri në orën 24:00. Krahas kësaj, ai ka kërkuar thirrjen urgjente të Këshillit Drejtues të PDK-së brenda një afati prej 48 orësh, me qëllim caktimin e një udhëheqjeje të përkohshme. Sipas qëndrimit të tij, struktura e re provizore duhet të pajiset me një mandat të qartë dhe të prerë për të drejtuar subjektin politik deri në organizimin e zgjedhjeve të ardhshme brenda partisë. “Krejt kryesia e PDK-së duhet të japë dorëheqje sonte, deri në orën 24:00. Këshilli Drejtues duhet të mblidhet brenda 48 orëve dhe të caktojë një kryesi të provizore, me mandat të qartë për ta udhëhequr partinë deri në mbajtjen e zgjedhjeve të reja. Me UÇK-në, me fatin e krerëve të UÇK-së dhe me të ardhmen e Kosovës nuk mund të luhet për interesa politike, këtu nuk e tolerojmë askënd. Këto janë çështje që prekin themelet e lirisë, sakrificën e popullit tonë dhe dinjitetin e shtetit tonë. Kërkesa është e qartë, dorëheqje sonte, mbledhje e Këshillit Drejtues brenda 48 orëve. Është koha për përgjegjësi dhe vendime konkrete. Me UÇK-në, me çlirimtarët. UÇK-ja është krenaria jonë. Drejtësi dhe liri për çlirimtarët”, ka theksuar Haxhiu në mesazhin e tij.