Përkushtim total te Barcelona: Yjet sfidojnë ditën e pushimit për t’u bërë gati për El Clasico

Pavarësisht se trajneri Hansi Flick kishte vendosur t'u jepte një ditë pushimi, disa prej futbollistëve të Barcelonës kanë zgjedhur të paraqiten vullnetarisht në qendrën stërvitore të klubit, për të mos lënë asgjë pas dorë në prag të supersfidës së së dielës kundër Real Madridit. Në ambientet e kompleksit "Ciutat Esportiva Joan Gamper" u panë të enjten emra kyç të skuadrës, duke dëshmuar shkallën e lartë të angazhimit në një nga periudhat më vendimtare të edicionit futbollistik. Kjo lëvizje e papritur erdhi vetëm pak orë pasi delegacioni katalanas ishte kthyer nga Parisi rreth orës 03:30 të mëngjesit, pas duelit të zjarrtë ndaj Paris Saint-Germain në Ligën e Kampionëve. Edhe pse të mërkurën ekipi kishte zhvilluar vetëm një seancë rikuperimi dhe Flick kishte përcaktuar një ditë relaksi për shkak të kalendarit tejet të ngjeshur, shtatë lojtarë vendosën të mos qëndronin larg fushës. Mes atyre që zbritën në fushë ose punuan në palestër ishin Lamine Yamal, Pedri, Fermín López, Gerard Martín, Xavi Espart, si dhe portieri veteran Wojciech Szczęsny. Krahas tyre, në qendër u shfaqën edhe lojtarët që ndodhen në proces rikuperimi nga dëmtimet, ku spikatnin Roony Bardghji, Andreas Christensen, Jules Koundé, Eric García dhe Dani Olmo, të gjithë të fokusuar te faza e riaftësimit. Mentaliteti fitues dhe serioziteti brenda grupit u vunë re sidomos te Lamine Yamal dhe Pedri, ky i fundit pas një paraqitjeje brilante në tokën franceze, ndërsa Yamal mbetet njeriu nga i cili pritet magjia në fushë këtë fundjavë. Një vëmendje të veçantë mori edhe gardiani polak Wojciech Szczęsny, i cili edhe në ditët e lira nuk e lë anash rutinën e tij, duke u paraqitur rregullisht për të mbajtur formën optimale përmes ushtrimeve fizike. Ndërkohë, stafi mjekësor dhe tekniko-atletik po bën çmos që të rikuperojë Jules Koundén me kohë, me mbrojtësin francez që po lufton fort për të fituar garën me kohën dhe për të siguruar një vend në formacionin titullar të Hansi Flickut kundër rivalëve të përjetshëm.