Tensione para Kryeministrisë: Policia ndërhyn me ujë me presion ndaj protestuesve në ditën e dhjetë të tubimit

Protesta e studentëve dhe qytetarëve para godinës së Kryeministrisë ka hyrë në ditën e saj të dhjetë këtë pasdite të enjte. Megjithëse situata u karakterizua nga qetësia për disa orë me radhë, pak minuta më parë janë shënuar tensionet e para, duke sjellë ndërhyrjen e forcave të rendit. Efektivët e policisë kanë përdorur ujë me presion për të shpërndarë turmën e protestuesve. Megjithatë, pas ndërhyrjes së autoriteteve, qytetarët janë larguar përkohësisht vetëm për t'u rigrumbulluar sërish në shesh. Kjo ditë proteste kishte nisur qysh në orën 09:00 para Kuvendit, në kohën kur po zhvillohej seanca plenare e shoqëruar me debate dhe tensione. Ndërkohë, organizatorët kanë paralajmëruar një tjetër tubim masiv përpara Kryeministrisë, duke u bërë thirrje qytetarëve përmes rrjeteve sociale që të bashkohen në shesh të shtunën, më 24 tetor. Sipas njoftimit zyrtar të shpërndarë me slloganin “Të shtunën, të gjithë në shesh!”, vendtakimi do të jetë në bulevardin “Dëshmorët e Kombit”. Në thirrjen publike theksohet se ky organizim do të ketë një karakter të gjerë, duke bashkuar rininë, qytetarët dhe diasporën.