Test i madh në Durrës, Elbasani kërkon kthesën ndaj liderëve të pamposhtur të Superiores

Këtë të shtunë, stadiumi “Niko Dovana” do të jetë qendra e vëmendjes për javën e 6-të të “Abissnet Superiore”, ku Teuta do të presë skuadrën e Elbasanit në një duel që premton emocione të forta. Ekipi verdheblu kërkon një reagim të menjëhershëm dhe, nën drejtimin e trajnerit të ri, Glen Daja, synon të realizojë surprizën e radhës duke i shërbyer humbjen e parë sezonale kryesuesve të kampionatit, të cilët deri më tani po e ruajnë ecurinë pa njollë. Për të ndezur atmosferën dhe për të rritur tensionin sportiv para kësaj sfide, drejtuesit e klubit elbasanas kanë publikuar një foto në rrjetet sociale, ku spikat prania e dy prej protagonistëve kryesorë, Rubin Hebaj dhe Ledjo Tresa. Dyshja në fjalë ka treguar formë të lartë individuale gjatë këtij sezoni, pavarësisht se ecuria e përgjithshme e skuadrës nuk i ka përmbushur plotësisht pritshmëritë, duke e pozicionuar Elbasanin në vendin e 6-të me gjithsej 7 pikë të grumbulluara. Një nga detajet më interesante të kësaj ndeshjeje lidhet me të kaluarën e sulmuesit Rubin Hebaj, i cili më parë ka mbajtur veshur fanellën e durrsakëve. Sulmuesi nga Shkodra ka qenë pjesë e Teutës gjatë dy periudhave të ndryshme, respektivisht në sezonet 2020/21 dhe 2022/23. Nga ana tjetër, Ledjo Tresa, ish-lojtar i Laçit, vazhdon të mbetet një armë kyç në repartin e sulmit dhe të mesfushës. Tashmë, trajneri Glen Daja ka në dispozicion të gjithë arsenalin e duhur për të tentuar triumfin ndaj kreut të klasifikimit.