Skandali financiar trondit Washingtonin: Hetohet Richard Grenell, përplasje të forta brenda rrethit të Trump

Pas ish-ambasadores së SHBA-së në Athinë, Kimberly Guilfoyle, dhe lidhjeve të saj me kreun e qeverisë shqiptare Edi Rama, një tjetër figurë e njohur diplomacie, Richard Grenell, po përballet me akuza të rënda për korrupsion në Washington. Hetimi zyrtar ndaj ish-diplomatit Richard Grenell është duke u zhvilluar intensivisht, ku autoritetet po verifikojnë dokumente dhe shkëmbime mesazhesh, sipas burimeve pranë Shtëpisë së Bardhë. Ky zhvillim vjen si pasojë e një konflikti të hapur brenda strukturave mbështetëse të presidentit Donald Trump, një përplasje që po komentohet gjerësisht në kryeqytetin amerikan. Ndonëse në qarqet politike flitet për një mundësi pezullimi deri në zbardhjen e plotë të çështjes pas zgjedhjeve të 3 nëntorit, një vendim i tillë formal ende nuk është konfirmuar zyrtarisht. Në thelb të këtij skandali qendron një skemë e dyshuar për “pagesa në këmbim të influencës”, e cila ka ndezur debate të ashpra mes aleatëve të ngushtë të kreut të Shtëpisë së Bardhë. Pas bujës rreth ish-ambasadores Guilfoyle, tani në qendër të vëmendjes është vendosur Richard Grenell, ish-ambasador në Gjermani, ish-i dërguar i posaçëm për dialogun ndërmjet Kosovës dhe Serbisë, si dhe ish-drejtues i përkohshëm i Kennedy Center. Në tetor të vitit 2026, ish-avokatja e Trump-it, Alina Habba Mildon, së bashku me bashkëshortin e saj, biznesmenin turk Turhan Mildon, ngritën akuza se Grenell ka manipuluar një transfertë monetare prej 17,6 milionë dollarësh. Sipas tyre, një fond prej rreth 5,6 milionë dollarësh që duhej të shërbente si donacion për Kennedy Center, nuk ka mbërritur kurrë në destinacion. Dokumentet dhe mesazhet e zbardhura tregojnë se më 3 maj 2025, Grenell kishte premtuar qasje ekskluzive në ngjarje VIP dhe takime me zyrtarë të lartë të administratës në Shtëpinë e Bardhë, në kompleksin Mar-a-Lago në Florida, si dhe me vetë presidentin, pasi fondet të kalonin te kompania me bazë në Teksas, Texas Armament & Technology. Transaksioni në fjalë lidhet me një marrëveshje tregtare që përfshin Republikën Demokratike të Kongos. Megjithatë, hetimet e brendshme kanë konstatuar se paratë kishin buruar nga një llogari zyrtare e qeverisë kongoleze dhe jo nga ajo personale e çiftit Mildon, siç pretendohej në fillim. Nga ana e tij, Grenell i ka hedhur poshtë me forcë të gjitha akuzat, duke i cilësuar ato si pretendime absurde dhe gënjeshtra të pastra. Ai ka deklaruar se nuk ka kërkuar dhe nuk ka përfituar asnjë fond financiar. Ndërkohë, presidenti Donald Trump i ka kërkuar këshilltarit ligjor të Shtëpisë së Bardhë, Will Scharf, që të analizojë me kujdes të gjitha dokumentet dhe provat e paraqitura. Kjo përplasje e brendshme dëshmon tensionet e thella mes aleatëve të presidentit, ndërkohë që Grenell kishte sqaruar se mandati i tij si i Dërguar Special i Presidentit për Misione Speciale kishte përfunduar që në shkurt të vitit 2026, duke mos qenë më pjesë aktuale e administratës. Në rajonin e Ballkanit, emri i Grenellit mbetet i lidhur ngushtë me skenën politike, veçanërisht për miqësinë e tij të gjatë me kryeministrin shqiptar Edi Rama dhe mbështetjen ndaj nismave rajonale. Ai ka përkrahur publikisht qëndrimet e qeverisë në Tiranë, përfshirë kritikat e drejtuara ndaj procesit gjyqësor ndaj Hashim Thaçit në Gjykatën Speciale në Hagë, ndërsa opozita shqiptare e ka cilësuar shpesh si një lobist të padeklaruar të Ramës në SHBA. Në Kosovë, ndërhyrjet e tij diplomatike dhe politike kanë qenë vazhdimisht në qendër të vëmendjes, të shoqëruara me kritika të ashpra ndaj kryeministrit Albin Kurtit dhe me mbrojtje të fortë ndaj figurës së Hashim Thaçit.