Abdixhiku: Lufta e UÇK-së mbrohet me vepra dhe mençuri, jo me fushata baltosjeje

Kryetari i Lidhjes Demokratike të Kosovës (LDK), Lumir Abdixhiku, ka reaguar ashpër pas rikthimit të ligjit, duke dënuar fushatën e sulmeve ndaj subjektit që ai drejton dhe shtrembërimin e qëndrimeve të tyre zyrtare rreth kësaj çështjeje. Nëpërmjet një reagimi publik, kreu i LDK-së ka theksuar se partia e tij është fyer padrejtësisht, është etiketuar si tradhtare dhe është paraqitur në mënyrë të rreme si kundërshtare e Ushtrisë Çlirimtare të Kosovës (UÇK). “Ligjin e kthyet. Por baltën që hodhët mbi LDK-në, ku do ta lini?”, ka shkruar Abdixhiku, duke shprehur indinjatën e tij ndaj gjuhës së përdorur. Ai ka ngritur shqetësimin edhe për barazimin e emrave të zyrtarëve të LDK-së me ata të Listës Serbe në opinionin publik, teksa ka nënvizuar se subjekti i tij ka ruajtur qëndrimin institucional pavarësisht presionit dhe linçimeve të vazhdueshme. Sipas Abdixhikut, ky ligj nuk ka pasur dhe nuk do të prodhojë asnjë lloj efekti juridik, ndërsa vendimin e partisë e ka cilësuar si një akt të udhëhequr nga përgjegjësia e lartë shtetërore ndaj Republikës së Kosovës. Në fund të reagimit të tij, ai u ka bërë thirrje strukturave dhe mbështetësve të LDK-së që të mbajnë kokën lart me krenari, duke u shprehur i bindur se vendimet e kësaj partie do ta kalojnë me sukses edhe këtë provë të kohës dhe historisë.