Zbardhen vendimet e Gjykatës: Lirohen 27 të ndaluarit pas protestave në kryeqytet

Gjykata e Tiranës ka vendosur lirimin e 27 qytetarëve që ishin shoqëruar pas tubimeve të zhvilluara në kryeqytet, pasi ka konstatuar se arrestimet në flagrancë për 22 prej tyre kanë qenë të paligjshme. Ndërkohë, për gjashtë persona të tjerë është vendosur masa e sigurimit personal e njohur si “Detyrimi për t’u paraqitur në Policinë Gjyqësore”. Këto vendime gjyqësore janë dhënë më 22 tetor, pas shqyrtimit të kërkesave të paraqitura nga organet e akuzës për verifikimin e ligjshmërisë së ndalimeve dhe caktimin e masave të sigurisë për individët e përfshirë në ngjarjet e protestave. Në seancën për grupin e parë prej 10 personash, togat e zeza deklaruan të paligjshme arrestimet për tetë prej tyre, duke mos caktuar asnjë masë sigurie. Për dy të pandehurit e tjerë, të identifikuar si T. T. dhe F. M., ndonëse arrestimi u konsiderua i ligjshëm, u caktua detyrimi që të paraqiten pranë Prokurorisë së Tiranës çdo të hënë të parë dhe të tretë të muajit, në orën 10:00. Në një tjetër seancë shqyrtimi për 11 persona, gjykata rrëzoi ligjshmërinë e tetë arrestimeve, duke lënë të lirë pa masë sigurie shtatë prej tyre. Për tre të tjerë, konkretisht M. M., L. S. dhe E. G., arrestimi u vlerësua i rregullt dhe u la detyrimi i paraqitjes çdo të hënë të tretë të muajit, në orën 10:00. Për individin me iniciale D. D., megjithëse arrestimi u shpall i paligjshëm, iu caktua masa e detyrimit për t’u paraqitur në Policinë Gjyqësore. Gjithashtu, vendimi ka përfshirë edhe gjashtë të mitur që ndodheshin në konflikt me ligjin. Për ta, gjykata ka rrëzuar arrestimet në flagrancë, nuk ka vendosur asnjë masë shtrënguese dhe ka urdhëruar lirimin e menjëhershëm, nëse nuk ka ndonjë urdhërarrest apo shkak tjetër ligjor për mbajtjen e tyre. Sipas dosjes hetimore, personat që po hetohen dyshohen, në varësi të pozitave të tyre, për vepra penale si kundërshtimi i forcave të rendit publik, organizimi dhe pjesëmarrja në tubime e manifestime të jashtëligjshme, si dhe dëmtimi i pronës. Në një nga dosjet përfshihen edhe akuza për prishje të qetësisë publike, bllokim të qarkullimit rrugor dhe goditje për shkak të detyrës. Për palët e pakënaqura, këto vendime mund të jenë objekt ankimi në Gjykatën e Apelit të Juridiksionit të Përgjithshëm brenda një afati prej pesë ditësh nga dita pasardhëse e njoftimit.