Vizita zyrtare në Romë, Ministri Sveçla diskuton me gjeneralin italian për ngritjen e Xhandarmërisë së Kosovës

Ministri i Punëve të Brendshme, Xhelal Sveçla, në kuadër të vizitës së tij zyrtare në shtetin italian, është pritur në një takim zyrtar në Komandën e Përgjithshme të Armatës së Karabinierëve nga shefi i Shtabit të kësaj komande, gjenerali Andrea Taurelli Salimbeni. Gjatë këtij takimi, ministri Sveçla e njohu gjeneralin italian me të arriturat dhe hapat e sigurt që Kosova ka ndërmarrë në sektorin e sigurisë, duke i dhënë një falënderim të veçantë kontributit të vazhdueshëm të Karabinierëve në mbështetjen e institucioneve vendore dhe garantimin e paqes e stabilitetit në vend. Sipas komunikatës zyrtare të lëshuar nga Ministria e Punëve të Brendshme, fokus kyç i bisedimeve ishte themelimi dhe funksionalizimi i Xhandarmërisë së Kosovës, një nismë kjo e vlerësuar si prioritet kyç i ekzekutivit, e cila tashmë ka hyrë në fazën e zbatimit nga dikasteri që ai drejton. Gjatë bisedimeve, dy zyrtarët e lartë shqyrtuan edhe mundësitë konkrete për intensifikimin e partneritetit, me theks të veçantë te shkëmbimi i praktikave më të mira, ekspertizës së avancuar dhe përvojave për ndërtimin sa më efikas të këtij mekanizmi të ri sigurie. Në njoftim gjithashtu u vu inkuadër tradita mbi 212-vjeçare e Armatës së Karabinierëve, e cila konsiderohet si një ndër strukturat më të etabluara dhe të besueshme të sigurisë në nivel evropian. Në përmbyllje të takimit, ministri Sveçla ritheksoi domosdoshmërinë e thellimit të bashkëpunimit me aleatët ndërkombëtarë, si një shtyllë kryesore për rritjen e kapaciteteve shtetërore dhe konsolidimin e sigurisë publike në Republikën e Kosovës.