Operacion kundër spiunazhit në Gjermani: Vihet në pranga ukrainasi që dyshohet se punonte për Kremlinin

Autoritetet gjermane kanë ndaluar një 53-vjeçar me shtetësi ukrainase në landin e Brandenburgut, i cili dyshohet se ka kryer aktivitete spiunazhi në dobi të një agjencie ruse të zbulimit. Sipas hetimeve paraprake, ai akuzohet për grumbullimin e të dhënave të klasifikuara që lidhen me sektorin e mbrojtjes në Evropë dhe mbrojtjen strategjike të kufirit lindor të NATO-s. Organet e akuzës federale në Gjermani bëjnë me dije se i dyshuari, i njohur si Vadym Y., ka keqpërdorur lidhjet e tij profesionale në industrinë e armatimeve për të siguruar dokumente dhe informacione të ndjeshme ushtarake. Ndërhyrja për kapjen e tij u ndërmarrë gjatë ditës së sotme në zonën e Oder-Spree nga efektivë të Policisë Kriminale Federale (BKA). Në vijim të procedurave, i ndaluari pritet të paraqitet nesër para gjyqtarit hetues pranë Gjykatës Federale të Drejtësisë në qytetin e Karlsruhes, ku do të vendoset masa e sigurisë për të. Sipas Prokurorisë Federale, ky operacion është pasojë e të dhënave të inteligjencës të ofruara fillimisht nga Zyra Federale për Mbrojtjen e Kushtetutës (BfV). Hetime paraprake sugjerojnë se Vadym Y. ka bashkëpunuar me strukturat e zbulimit rus përmes një personi të tretë, të paktën duke filluar nga muaji korrik i vitit 2025. Fokusi kryesor i veprimtarisë së tij të paligjshme dyshohet se ka qenë te zhvillimet në industrinë ushtarake evropiane dhe te pikat e ndjeshme gjeostrategjike për sigurinë e aleancës ushtarake perëndimore në Evropën Lindore. Banori i qytetit Eisenhüttenstadt, i identifikuar si shtetas ukrainas, dyshohet se ka grumbulluar detaje teknike rreth prodhimit të mjeteve të blinduara, municioneve luftarake dhe materialeve shpërthyese. Përveç sekreteve industriale, ai dyshohet se ka siguruar edhe të dhëna konfidenciale mbi efektivët dhe bazat ushtarake në rajone kyçe për mbrojtjen e krahut lindor të NATO-s. Autoritetet njoftojnë se hetimet për këtë rast vijojnë ende, ndërsa baza e plotë e akuzave ndaj tij do të kalojë në filtër gjatë procesit gjyqësor.