Kriza në Old Trafford: Michael Carrick mungon në stërvitje, United nis kontaktet me Julian Nagelsmann

Gjermani Julian Nagelsmann është vënë në shënjestër të drejtuesve të Manchester Unitedit si opsioni ideal për të pasuar Michael Carrickun në krye të shtabit teknik të “Djajve të Kuq”. Pozita e trajnerit 45-vjeçar është tronditur thellë pas disfatës turpëruese 4-1 kundër Comos në Ligën e Kampionëve, një rezultat ky që vetëm sa ka thelluar krizën e rezultateve negative të skuadrës angleze. Me këtë dështim të fundit, gjiganti nga Old Trafford ka regjistruar plot shtatë ndeshje radhazi pa asnjë fitore në të gjitha kompeticionet, duke shtuar kështu pikëpyetjet e mëdha rreth fatit të Carrickut në stolin e skuadrës. Tensioni brenda grupit është reflektuar edhe në fushë, ku pas sfidës me Comon, kapiteni Bruno Fernandes thuhet se ka shprehur hapur pakënaqësitë e tij, duke kritikuar vendimet taktike të trajnerit. Ndërkohë që zërat për shkarkimin e mundshëm të tij sa vijnë e shtohen, strukturat drejtuese të klubit po shqyrtojnë seriozisht alternativat për një ndryshim të papritur në udhëheqjen e ekipit të parë. Situata është tensionuar edhe më shumë pasi Carrick nuk është dukur fare në kompleksin stërvitor të klubit në Carrington në orën 07:30 të Mëngjesit, duke thyer kështu rutinën e tij të zakonshme.