Reagim i ashpër nga SHBA: Kongresmeni Ritchie Torres dënon dhunën policore gjatë protestave në Shqipëri

Anëtari i Dhomës së Përfaqësuesve të SHBA-së, Ritchie Torres, ka reaguar ashpër ndaj ndërhyrjes së dhunshme të forcave të rendit gjatë protestave në Shqipëri, duke kërkuar ruajtjen e të drejtave të qytetarëve dhe uljen e menjëhershme të tensioneve. Përmes një qëndrimi publik, kongresmeni amerikan e cilësoi të papranueshëm përdorimin e forcës ndaj manifestuesve, duke theksuar se veprime të tilla duhet të ndalen pa vonesë. Ai nënvizoi se e drejta për të protestuar në mënyrë paqësore është e patjetërsueshme për qytetarët shqiptarë. Sipas ligjvënësit amerikan, Policia e Shtetit ka për detyrë primare mbrojtjen e të drejtave të protestuesve dhe garantimin e zbatimit të shtetit të së drejtës, pa cenuar liritë themelore. Në deklaratën e tij zyrtare, Torres u shpreh: "Jam thellësisht i shqetësuar nga shpërthimi i dhunës ndaj protestuesve në Shqipëri. Veprimet e ndërmarra nga Policia Shqiptare janë të papranueshme dhe duhet të marrin fund. Shqiptarët kanë të drejtë të protestojnë në mënyrë paqësore, policia duhet të respektojë të drejtën e protestuesve për të protestuar dhe duhet të garantojë zbatimin e shtetit të së drejtës. Situata duhet të shtensionohet për t’i dhënë fund dhunës alarmante."