E rëndë në Arabinë Saudite: Sulmi në aeroportin e Dammamit lë një të vrarë dhe tetë të plagosur

Një ngjarje e rëndë ka ndodhur në lindje të Arabisë Saudite, ku si rrjedhojë e një goditjeje në Aeroportin Ndërkombëtar "King Fahd" në qytetin Dammam, ka humbur jetën një person dhe tetë të tjerë kanë marrë lëndime trupore. Bilanci tragjik është konfirmuar zyrtarisht nga Autoriteti i Aviacionit Civil në vend, i cili përmes një komunikate të publikuar në rrjetin social X, bëri të ditur shifrat e viktimave dhe të të lënduarve nga kjo ngjarje. Sipas organit rregullator saudit, ngjarja ka shkaktuar gjithashtu dëmtime materiale në ambientet e aeroportit, ndërsa ekspertët po punojnë për vlerësimin e plotë të pasojave. Deri në këto momente, autoritetet nuk kanë dhënë hollësi mbi mekanizmin e përdorur në sulm dhe as mbi përgjegjësit e mundshëm. Kjo nuk është hera e parë që ky objekt goditet, pasi aeroporti "King Fahd" ishte shënjestruar edhe në fillim të muajit tetor. Incidenti vjen në një kohë kur kryengritësit Huthi nga Jemeni kanë intensifikuar sulmet e tyre ndaj nyjeve strategjike dhe aeroporteve në territorin e Arabisë Saudite.