Prishtinë: Hapet sezoni i imunizimit kundër gripit, ja çfarë duhet të dini

Qendra Kryesore e Mjekësisë Familjare (QKMF) në kryeqytet ka bërë të ditur se duke filluar nga sot, 22 tetor, qytetarët e Prishtinës mund të vaksinohen kundër gripit sezonal. Procesi i vaksinimit do të zhvillohet në të gjitha njësitë përkatëse brenda Qendrave të Mjekësisë Familjare (QMF) nëpër lagje të ndryshme, duke u ofruar banorëve mundësinë që të drejtohen në pikat më të afërta të tyre për të marrë dozën mbrojtëse. Për të kryer procedurën e vaksinimit, qytetarët janë të obliguar të prezantojnë letërnjoftimin. Ndërsa, për vaksinimin e fëmijëve, kërkohet paraqitja e certifikatës së lindjes që përmban numrin personal, dokument ky i domosdoshëm për futjen e saktë të të dhënave në sistemin shëndetësor.