Bruno Fernandes kritikon ashpër taktikat e Michael Carrickut pas humbjes së Manchester Unitedit me deklarata tronditëse

Bruno Fernandes ka vënë në pikëpyetje publikisht taktikat e Michael Carrickut pas humbjes së rëndë 4-1 të Manchester Unitedit nga Como, duke lënë të kuptohet se trajneri dhe stafi i tij nuk e përgatitën siç duhet skuadrën për këtë ndeshje. Kapiteni i “Djajve të Kuq” u largua nga fusha në minutën e 66-të, duke tundur kokën në shenjë pakënaqësie, ndërsa pas ndeshjes kritikoi mënyrën se si skuadra u përpoq të mbronte. “Është vendim i stafit që të mos bëjmë presion lojtar më lojtar dhe ndonjëherë të lëmë hapësira prapa, duke u përpjekur ta fitojmë topin dhe duke i pritur kundërshtarët. Por, kur u jep hapësirë skuadrave të tilla, ato fitojnë vetëbesim”, deklaroi Fernandes për TNT Sports. I pyetur nëse po sugjeronte se Carrick kishte gabuar me taktikat, portugezi u përgjigj: “Këtë duhet ta vlerësojnë trajneri dhe stafi, jo unë. Ndonjëherë duhet të jesh më i guximshëm nën presion, të rrezikosh duke bërë presion lart dhe duke e vënë kundërshtarin në vështirësi. “Siç e patë te Como, qendërmbrojtësi i tyre vinte të më markonte në gjysmën tonë të fushës. Duhet ta bëjmë këtë si skuadër, por nuk ia dolëm. “Një skuadër që luan përmes qendrës, me pasime të shkurtra mes lojtarëve, mund të të ndëshkojë edhe nga krahët nëse i jep shumë kohë dhe hapësirë”, shtoi ai. Carrick reagoi ndaj deklaratave të kapitenit, duke mbrojtur qasjen taktike të skuadrës. “Në pjesën e dytë, ne bëmë presion pjesërisht lojtar më lojtar dhe përfunduam duke pësuar gol nga ajo mënyrë loje. Pavarësisht sistemit apo taktikave që përdor, nëse nuk vrapon, nuk lëviz përpara dhe nuk kthehesh prapa, nuk do të fitosh”, deklaroi trajneri anglez. Përplasja e fundit vjen vetëm një javë pasi Lisandro Martinez kritikoi drejtorin teknik të Manchester Unitedit, Jason Wilcox. Pas humbjes 2-0 nga Atletico Madridi, mbrojtësi argjentinas kishte deklaruar se priste “100 për qind më shumë” nga Wilcox sa i përket përforcimit të skuadrës, pasi Carrick i kishte udhëhequr “Djajtë e Kuq” drejt vendit të tretë sezonin e kaluar. Për më tepër, Carrick shkaktoi polemika edhe pas humbjes nga Como. Me të përfunduar ndeshja, ai nuk shkoi fillimisht te lojtarët e tij, por u drejtua menjëherë te tifozët mysafirë në stadiumin “Giuseppe Sinigaglia”. Trajneri ngriti duart në shenjë kërkimfaljeje ndaj tifozëve që kishin udhëtuar për ta mbështetur skuadrën. “Më interesojnë jashtëzakonisht shumë tifozët. Ata janë zemra e këtij klubi dhe do të jenë gjithmonë. Mund të kërkoj vetëm falje për paraqitjen. Ata bënë gjithçka për të ardhur këtu sonte dhe u detyruan të shikonin një paraqitje të tillë. I kuptoj plotësisht”, tha Carrick. “Nuk ka asnjë justifikim. Mendoj se kjo është thjesht e papranueshme”, përfundoi ai. Carrick refuzoi të fliste për të ardhmen e tij, e cila tashmë duket gjithnjë e më e pasigurt, pasi Manchester Unitedi ka regjistruar shtatë ndeshje radhazi pa fitore. Sipas mediumit anglez talkSPORT, drejtuesit e klubit kanë kontaktuar tashmë rreth mundësisë së emërimit të Julian Nagelsmannit si pasues të mundshëm të Carrickut.