Pezeshkian i shtrin dorën e pajtimit Uashingtonit: Teherani i hapur për pazar me administratën Trump

Kreu i shtetit të Iranit, Masoud Pezeshkian, ka bërë të tohur se autoritetet në Teherani janë plotësisht të hapura për t'iu rikthyer tavolinës së bisedimeve me Shtetet e Bashkuara, me synimin për të arritur një marrëveshje gjithëpërfshirëse me administratën e udhëhequr nga presidenti Donald Trump. Gjatë një prononcimi për rrjetin mediatik Fox News, Pezeshkian u shpreh qartë se kombi i tij kurrë nuk ka pasur për qëllim ndezjen e ndonjë konflikti, duke shtuar se përleshjet u janë servur padrejtësisht nga jashtë. Ai bëri me dije se pala iraniane mbetet e palëkundur në gatishmërinë e saj për dialog, me kushtin e vetëm që gjithçka të zhvillohet brenda kornizave të normave ndërkombëtare. “Ne nuk e zgjodhëm luftën. Lufta na u imponua. Ne nuk kërkojmë luftë. Sa herë që na sulmojnë, ne detyrohemi të mbrohemi”, deklaroi ndër të tjera presidenti iranian, duke ia kaluar topin e përgjegjësisë Uashingtonit për ndalimin e armiqësive. Sipas numrit një të Iranit, tani është radha e Shteteve të Bashkuara që të tregojnë vullnet politik për t'i dhënë fund kësaj situate, ndërsa ritheksoi se vendi i tij nuk synon zgjatjen e mëtejshme të krizës aktuale. “Ne nuk duam të vazhdojmë. Është Amerika ajo që duhet të zgjedhë nëse do t’i japë fund apo jo”, u shpreh ai. Pezeshkian theksoi gjithashtu se ekziston ende mundësia reale për të çuar përpara një marrëveshje të mirëfilltë të negociuar me kreun e Shtëpisë së Bardhë, Donald Trump, nëse respektohen interesat e ndërsjella dhe ligjet ndërkombëtare. “Ne arritëm një marrëveshje me presidentin tuaj dhe, mbi atë bazë, jemi të gatshëm dhe ende dëshirojmë të ecim përpara”, përsëriti ai gjatë intervistës. Këto deklarata vijnë në një kohë kur diplomacia ndërkombëtare po ushtron presion intensiv mbi të dyja palët për të shuar vatrat e zjarrit. Vetë presidenti amerikan, nga ana e tij, është shprehur më herët se mbetet i hapur ndaj mundësisë së një marrëveshjeje dhe një takimi të drejtpërdrejtë me homologun e tij iranian. Lidhur me shqetësimet rreth ambicieve atomike të Teheranit, Pezeshkian ka hedhur poshtë çdo aludim se vendi i tij po punon për armatim bërthamor, duke konfirmuar se ata janë të gatshëm t'i përmbahen rreptësisht Traktatit për Mospërhapjen e Armëve Bërthamore. Në lidhje me lidhjet e dyshuara mes Teheranit dhe rebelëve Huthi në Jemen, lideri iranian ka mohuar çdo formë komandimi apo kontrolli mbi vendimet e tyre, duke saktësuar se pavarësisht kontakteve ekzistuese, grupi në fjalë vepron në mënyrë plotësisht të pavarur. Intervista e plotë e presidentit iranian për Fox News u realizua në kuadër të vizitës së tij zyrtare në Nju Jork për punimet e Asamblesë së Përgjithshme të Kombeve të Bashkuara, në një moment kritik ku fati i marrëdhënieve SHBA-Iran mbetet në qendër të vëmendjes globale.