Kërcënim global nga El Ninjo: OKB lëshon alarmin dhe kërkon veprim të menjëhershëm ndërkombëtar

Organizata e Kombeve të Bashkuara (OKB) ka dhënë një paralajmërim të fortë ditën e mërkurë, duke theksuar se fenomeni klimatik El Ninjo po shënon përmasa tejet shqetësuese në shkallë globale. Institucioni ndërkombëtar u ka bërë thirrje qeverive anembanë botës që të ndërmarrin masa urgjente parandaluese për t'u bërë ballë pasojave më të rënda të mundshme. Edhe pse pika kulmore e këtij fenomeni është parashikuar të shënohet gjatë muajit dhjetor, ndikimi i tij i drejtpërdrejtë te njerëzit përmes temperaturave rekord, reshjeve shkatërruese dhethatësirës pritet të vazhdojë gjatë gjithë vitit 2027 dhe më tej. Përfaqësuesit e OKB-së nënvizuan domosdoshmërinë e ndërhyrjes për të mbrojtur shtresat më të cënueshme para se situata të dalë jashtë kontrollit. “Fenomeni aktual El Ninjo mund të jetë i paprecedentë për nga fuqia: përtej kufijve të grafikëve të monitorimit që kemi përdorur gjatë katër dekadave të fundit”, deklaroi Celeste Saulo, drejtuesja e agjencisë së OKB-së për motin dhe klimën. Ajo shtoi se bota tashmë po përballet me kushte ekstreme meteorologjike, të cilat pritet të përshkallëzohen më tej duke shkaktuar efekte zingjirore. Këto deklarata u bënë gjatë një konference për shtyp në Gjenevë, ku drejtuesja e Organizatës Botërore Meteorologjike (OBM) doli krah për krah me shefin e ndihmave të OKB-së, Tom Fletcher. Të dy zyrtarët e lartë kërkuan një angazhim të menjëhershëm dhe të bashkërenduar paraprakisht, me qëllim që të mbrohen komunitetet që tashmë mbijetojnë në kushte tejet të rënda. “Ne nuk mund ta ndalim El Ninjon, por mund të parandalojmë shumë nga pasojat e tij më të rënda për njerëzit”, u shpreh z. Saulo. Nga ana e tij, Tom Fletcher e cilësoi El Ninjon si një fatkeqësi me përmasa shkatërruese, e cila do të sjellë kaos të plotë në Azi, Amerikën Latine, Afrikën Jugore dhe Lindore, si dhe në zonën e Paqësorit. Ai paralajmëroi se faturat afatgjata të kësaj krize “do të ndihen për muaj të tërë dhe potencialisht për vite me radhë... sepse kemi kriza që mbivendosen njëra mbi tjetrën”. Si faktorë shtesë rëndues, ai përmendi lëvizjet masive të popullsisë dhe konfliktet e hapura, shtrenjtimin e ndjeshëm të ushqimeve, karburanteve dhe plehrave kimike, si dhe shkurtimin drastik të ndihmave ndërkombëtare. “Rreziku është që dhjetëra miliona njerëz të shtyhen drejt nevojës për ndihmë humanitare”, theksoi ai, duke shtuar se rreth 50 milionë qytetarë mund të gjenden përballë rrezikut të urisë. Gjatë fjalës së tij, Fletcher bëri me dije se dy javët në vijim janë vendimtare për të ndërmarrë hapa konkretë. Sipas tij, dëmet e shkaktuara nga ky fenomen nuk do të kufizohen vetëm në territorin e shteteve që goditen në vijën e parë. “Ai do të shkaktojë goditje ekonomike për ekonominë globale dhe do të nxisë konflikte të mëtejshme, zhvendosje të popullsisë dhe migrim”, shtoi ai. “Po jap alarmin se sistemi humanitar... nuk mund ta përballojë i vetëm një kërcënim të kësaj përmase” u shpreh ai, duke u bërë thirrje qeverive, bankave të zhvillimit dhe institucioneve financiare ndërkombëtare që të çlirojnë fondet e nevojshme “përpara se të shkaktohen dëmet”. Për të zbutur këtë krizë, Fletcher njoftoi ndarjen e 50 milionë dollarëve në funksion të mbështetjes për 11 shtete që rrezikohen në mënyrë direkte, ku bëjnë pjesë Çadi, El Salvadori, Etiopia, Somalia dhe Sudani i Jugut. Fenomeni natyror El Ninjo njihet për rritjen e temperaturave të ujit në zonën qendrore dhe lindore të Oqeanit Paqësor pranë ekuatorit, duke sjellë transformime globale në drejtimin e erërave, presionin atmosferik dhe shpërndarjen e reshjeve të shiut. Ky cikël natyror shfaqet rregullisht çdo dy deri në shtatë vjet dhe ka një jetëgjatësi prej nëntë deri në dymbëdhjetë muaj. Kushtet atmosferike alternojnë vazhdimisht mes fazës së El Ninjos dhe asaj të kundërt, La Ninja, ndërkohë që në intervalet mes tyre mbretërojnë kushte neutrale. Ky fenomen klimatik pritet të intensifikojë më tej rritjen e temperaturave në pjesën më të madhe të globit, duke bashkëvepruar ngushtë me ndryshimet klimatike të nxitura nga dora e njeriut.