Ndryshime në bordin teknik, Dinamo ndan rrugët me Glen Dajën

Klubi i njohur kryeqytetas, Dinamo, ka zyrtarizuar përfundimin e bashkëpunimit me zëvendëstrajnerin e tij, Glen Daja. Ky i fundit do të nisë një kapitull të ri në karrierën e tij, duke marrë drejtimin si trajner i parë te skuadra e Elbasanit, e cila është njëkohësisht edhe rivale e tyre në Abissnet Superiore. Përmes një njoftimi zyrtar, drejtuesit e “bluve” kanë shprehur falënderimet e tyre më të sinqerta për punën dhe përkushtimin e treguar nga Daja gjatë dy viteve të kaluara në kryeqytet. “FC Dinamo City njofton përfundimin e bashkëpunimit me zëvendëstrajnerin Glen Daja, i cili do të vijojë karrierën e tij si trajner i parë i AF Elbasanit. Klubi e falënderon Glen Dajën për profesionalizmin, përkushtimin dhe kontributin e çmuar gjatë dy viteve të suksesshme si pjesë e stafit teknik të skuadrës sonë”, thuhet në njoftimin e klubit. Gjatë periudhës së tij në kryeqytet, Daja ka qenë një element kyç i sukseseve të Dinamos, duke ndihmuar skuadrën në fitimin e dy Kupave të Shqipërisë dhe një Superkupe. Gjithashtu, ai ka dhënë kontributin e tij në arritjen e madhe të kualifikimit për dy sezone radhazi në fazën Play-Off të UEFA Conference League. Presidenti Ardian Bardhi, së bashku me të gjithë familjen dinamovite, i kanë shprehur mirënjohjen e thellë për punën e palodhur, duke i uruar njëkohësisht suksese në sfidën e tij të re si trajner kryesor. “Faleminderit për gjithçka dhe suksese, Glen!”, përfundon mesazhi i klubit. Ndërkohë, ky ndryshim në staf vjen në një moment delikat për Dinamon, e cila po kalon një periudhë jo të mirë në kampionat. Me dy humbje radhazi në Abissnet Superiore gjatë javëve të fundit, skuadra kryeqytetase ka humbur ritmin dhe kontaktin me Teutën dhe Egnatian në majën e renditjes.