Shiroka-Pula takon drejtuesit e sistemit të drejtësisë

Presidentja e Kosovës, Justina Shiroka-Pula, ka pritur në takim kryesuesin e Këshillit Prokurorial të Kosovës (KPK), Arian Gashi, kryeprokurorin e Shtetit, Zejnullah Gashi, si dhe kryesuesin e Këshillit Gjyqësor të Kosovës (KGJK), Rrustem Thaqi. Në fokus të takimit ishin reformat në drejtësi, sfidat me të cilat përballen institucionet e sistemit prokurorial dhe nevoja për mbështetje më të madhe institucionale. Gjatë takimit, Arian Gashi dhe Zejnullah Gashi e uruan presidenten Shiroka-Pula për zgjedhjen në këtë detyrë, ndërsa e njoftuan për zhvillimet në sistemin prokurorial dhe vështirësitë që po ndikojnë në funksionimin e institucioneve të Prokurorit të Shtetit. Ata veçuan mungesën e buxhetit të mjaftueshëm dhe sfidat infrastrukturore, duke theksuar se mbështetja institucionale është e domosdoshme për përmbushjen e mandatit kushtetues dhe ligjor të sistemit prokurorial, si dhe për avancimin e reformave në drejtësi. Nga ana e saj, presidentja Justina Shiroka-Pula shprehu përkushtimin për të përkrahur reformat në drejtësi dhe për të mbështetur institucionet përkatëse në përballimin e sfidave. Ajo theksoi rëndësinë e adresimit të problemeve buxhetore, sigurimit të mbështetjes së nevojshme institucionale dhe avancimit të sundimit të ligjit në Republikën e Kosovës. Në përfundim të takimit, bashkëbiseduesit u pajtuan se ruajtja e pavarësisë institucionale, forcimi i sundimit të ligjit dhe mbështetja e reformave në drejtësi mbeten thelbësore për funksionimin e institucioneve dhe përmbushjen e përgjegjësive të tyre në shërbim të qytetarëve.