Rexhep Shahu: Gjykata Speciale nuk është e Serbisë, katër të dënuarit nuk identifikohen me UÇK-në

Publicisti i njohur Rexhep Shahu ka adresa kritika të forta ndaj debateve publike dhe protestave të fundit në vend, duke hedhur poshtë narrativën se Gjykata Speciale përfaqëson interesat e Serbisë. Në një shkrim autorial, Shahu thekson se ky institucion i drejtësisë nuk është krijuar nga Serbia, por është themeluar nga vetë liderët kosovarë, Hashim Thaçi dhe Kadri Veseli, për të shmangur një mekanizëm ndërkombëtar më të dëmshëm nën ombrellën e OKB-së. Sipas tij, Thaçi dhe Veseli vepruan për të mbrojtur interesat e shtetit, duke ia besuar procesin vendeve perëndimore që çliruan Kosovën, çka sipas tij dëshmohet edhe nga fakti se lufta dhe imazhi i UÇK-së mbetën të pacenuara. Duke komentuar zhvillimet në sheshe dhe përdorimin e emrit të UÇK-së, Shahu thekson se ajo e ka përfunduar misionin e saj historik me përfundimin e luftës më 12 qershor 1999 në Kumanovë, ndërsa ata që protestojnë sot nuk mund ta barazojnë veten me ushtarët e vërtetë të lirisë. Në përfundim, ai vlerëson se heronjtë e vërtetë të UÇK-së ruajnë një heshtje dinjitoze dhe jetojnë me ndershmëri, larg kamerave, shfaqjeve publike dhe manipulimit të emrit të lavdishëm të ushtrisë për qëllime ditore.