Trazirat në Francë paralizojnë futbollin: Shtyhen disa ndeshje kyçe për arsye sigurie

Vala e protestave të fuqishme që ka përfshirë Francën gjatë kësaj periudhe ka krijuar një situatë të tensionuar, e cila tashmë ka dhënë efektet e saj edhe në kalendarin e ngjarjeve sportive në vend. Për shkak të shqetësimeve serioze për rendin dhe qetësinë publike, autoritetet kanë marrë vendimin që disa sfida futbollistike të shtyhen për një moment të dytë. Frika nga incidente ka prekur fillimisht kategorinë e dytë të futbollit francez, ku takimi ndërmjet Montpellierit dhe Red Starit është prekur drejtpërdrejt. Ndeshja që ishte caktuar të luhej të shtunën në orën 14:00, është dashur të zhvendoset në mbrëmjen e së hënës, fiks në orën 20:45, kjo për shkak të protestave masive që priteshin në qytetin e Montpellierit. Megjithatë, vala e shtyrjeve nuk ka kursyer as elitën e futbollit francez, Ligue 1. Ndeshja mes Toulouse dhe Troyes, e cila ishte parashikuar të niste të shtunën në orën 17:15, është shtyrë për të dielën, pasi në rrugët e Toulouse paralajmëroheshin demonstrata të ashpra. Edhe nivelet e tjera të garave, përfshirë futbollin rajonal, kanë pësuar ndryshime drastike në oraret e tyre. Përballja e së shtunës ndërmjet Bordeaux dhe Stade Montois u desh të shtyhej gjithashtu për shkak të situatës së tensionuar. Sqarimi zyrtar nga klubet thekson se garancia e sigurisë maksimale ishte e pamundur të arrihej, duke qenë se të gjitha kapacitetet e forcave të rendit janë ridrejtuar për të menaxhuar protestat e paralajmëruara për ditën e shtunë.