Courtois del në mbrojtje të Mbappé: Përtej trofeve, ai ishte më i miri në planin individual

Thibaut Courtois, portieri i njohur i Real Madridit, është shprehur i bindur se bashkëlojtari i tij, Kylian Mbappé, e gëzon meritën e plotë për të fituar “Topin e Artë”, pavarësisht se ai pranon se ylli i ri Lamine Yamal ka në favor të tij sukseset e arritura me Barcelonën dhe kombëtaren e Spanjës. Gjatë një interviste për platformën “DAZN”, dhënë në prag të ceremonisë festive që do të zhvillohet të hënën në Londër, gardiani belg theksoi: “Besoj se Kylian e meriton, por njerëzit votojnë sipas logjikës së tyre. Duhet të zgjedhim dikë që ka fituar trofe apo dikë që ka qenë mbi të gjithë gjatë sezonit, edhe pse nuk ka fituar asgjë?”. Duke vijuar më tej analizën e tij, portieri shtoi: “Mendoj veçanërisht për Kylian. Individualisht, askush nuk ka qenë më i mirë se ai, por, për fat të keq, ne nuk kemi fituar asgjë si skuadër”. Në argumentimin e tij, Courtois solli në vëmendje faktin se Mbappé u rendit i katërti në Kampionatin Botëror, ku u kurorëzua si golashënuesi më i mirë i kompeticionit, ndërkohë që në krahun tjetër, Yamal triumfoi në La Liga me fanellën e katalanasve dhe u shpall kampion Europe me spanjollët. Duke u ndalur te gara e kaluar e “Topit të Artë” për vitin 2024, reprezentuesi belg pranoi se priste që triumfi t'i takonte ose Vinícius Júnior ose Dani Carvajal, ndërsa çmimi prestigjioz përfundimisht i orientohej mesfushorit Rodri. “Ndonjëherë është e vështirë të dish si duhet votuar për Topin e Artë”, – përmbylli deklaratën e tij Courtois.