Hap historik: Forca Ajrore e Shqipërisë nis kontingjentin e parë në misionin e KFOR-it

Për herë të parë në histori, Forca Ajrore e Shqipërisë ka nisur zyrtarisht kontingjentin e saj ushtarak për t'u bërë pjesë e misionit paqeruajtës të NATO-s në Kosovë, KFOR. Ky zhvillim i rëndësishëm u bë i ditur nga Shefi i Shtabit të Përgjithshëm të Forcave të Armatosura të Shqipërisë, gjenerallejtënant Arben Kingji. Gjatë ceremonisë, gjenerallejtënant Kingji e vlerësoi këtë dislokim si një detyrë me përgjegjësi të lartë dhe si një dëshmi të qartë të rolit aktiv që Shqipëria dhe ushtria e saj luajnë brenda Aleancës Euroatlantike. Duke u dhënë zemër efektivëve, ai përcjelli mesazhin inkurajues: “Mision të mbarë dhe shërbim të suksesshëm në çdo detyrë”.