Nis epoka e re e energjisë: Dërgesa e parë me naftë ruse drejt Shteteve të Bashkuara niset këtë të enjte

Tregu global i energjisë shënon një kthesë të rëndësishme, pasi zëvendëskryeministri rus për Energjinë, Alexander Novak, ka konfirmuar se cisterna e parë me naftë ruse për në SHBA do të nisë lëvizjen e saj ditën e enjte, më 22 tetor. Kjo lëvizje vjen pas marrëveshjes së bujshme të arritur në fillim të këtij muaji mes presidentit amerikan Donald Trump dhe Moskës zyrtare, marrëveshje e cila parashikon heqjen e sanksioneve ndaj Rusisë. Megjithatë, ky hap ka ngjallur reagime të ashpra dhe kritika të forta nga Kievi zyrtar dhe aleatët e tij rajonalë. Kreu i Shtëpisë së Bardhë, Donald Trump, arsyeton se ky vendim ka për qëllim uljen e çmimeve të karburantit për qytetarët amerikanë, vetëm pak ditë para zgjedhjeve të mesmandatit të caktuara për 3 nëntor. Nga ana e saj, Moska zyrtare e hoqi embargon mbi eksportet e naftës më 9 tetor, menjëherë pas njoftimit të liderit amerikan. Kjo embargo ishte vendosur më parë për të përballuar mungesat në tregun e brendshëm rus, të shkaktuara nga sulmet ukrainase mbi rafineritë vendase. Sipas zyrtarit të lartë rus Alexander Novak, anija do të transportojë saktësisht 40,000 tonë metrikë derivate, ndërsa detajet rreth portit të nisjes nuk janë bërë publike. "Kjo është vetëm fillimi; dërgesa të reja do të pasojnë. Dy udhëheqësit kanë dakordësuar këtë pakt dhe ne do të bëjmë çmos për të përmbushur kërkesat e tregut amerikan," deklaroi Novak, duke iu referuar mediave vendase. Në linjë me këtë dinamikë, presidenti Trump ka paralajmëruar se Rusia do të dërgojë menjëherë 300,000 tonë metrikë naftë, që përkojnë me rreth 2.25 milionë fuçi. Më pas, ky vëllim pritet të rritet me 500,000 tonë gjatë muajit nëntor, për t'u pasuar nga një milion tonë shtesë në një të ardhme të afërt.