Fokus te gratë rurale në Prishtinë: Apeli për mbështetje më të madhe institucionale dhe financiare në bujqësi

Sheshi “Zahir Pajaziti” në kryeqytet është shndërruar në pikëtakim për prodhuesit vendorë, ku është mbajtur panairi dedikuar Ditës Ndërkombëtare të Gruas Rurale. Ky organizim u ndërmor si niciativë e përbashkët mes organizatës EcoKosWomen dhe Shoqatës së Prodhuesve të Qumështit të Kosovës, për të promovuar dhe vlerësuar kontributin e kësaj shtrese në shoqëri. Gjatë këtij eventi u evokua roli kyç i grave në fusha të ndryshme si bujqësia, blegtoria, përpunimi i ushqimit dhe menaxhimi i sipërmarrjeve familjare, të cilat ndikojnë direkt në ekonominë e vendit. Kryetari i Shoqatës së Prodhuesve të Qumështit të Kosovës, Naser Bajraktari, u shpreh se angazhimi i grave në zonat rurale mbetet jetik, pavarësisht sfidave dhe mosvlerësimit adekuat të punës së tyre. “Gratë rurale kanë një rol të pazëvendësueshëm, jo vetëm në sektorin e prodhimit të qumështit dhe blegtorisë, por edhe në bujqësi, në përpunimin e produkteve ushqimore, në bizneset familjare dhe në shumë veprimtari të tjera që kontribuojnë në zhvillimin ekonomik. E dimë se puna e tyre shpesh është e vështirë dhe nuk vlerësohet gjithmonë sa duhet. Prandaj, si Shoqatë e Prodhuesve të Qumështit të Kosovës, jemi të përkushtuar të vazhdojmë mbështetjen për gratë rurale, duke promovuar punën e tyre dhe duke krijuar mundësi për fuqizimin dhe zhvillimin e tyre ekonomik”, ka deklaruar Bajraktari. Në fjalën e tij, ministri i Bujqësisë, Armend Muja, bëri të ditur se rreth 15 për qind e përfituesve nga skemat mbështetëse të ministrisë janë gra, ndërsa theksoi pronësinë si pengesën kryesore për këtë komunitet. “Bazuar në të dhënat e Ministrisë së Bujqësisë, 15 për qind e përfituesve në skemat tona janë gra. Por një nga problemet që ky komunitet ballafaqohet është prona. Siç e dimë, vetëm rreth 5 për qind e pronave në Kosovë janë në pronësi të grave. Kjo është barriera e parë strukturore, të cilën dëshirojmë ta tejkalojmë, dhe nga viti tjetër ministria e Bujqësisë do te ndërmarr masa afirmative qe e vlerësojnë ketë si sfidën numër një”, ka thënë ai. Edhe drejtoresha e Bujqësisë në Komunën e Prishtinës, Jeta Rafuna, e vuri theksin te rëndësia e këtyre fermereve në zhvillimin e qëndrueshëm ekonomik. “Gratë fermere janë shtyllë e rëndësishme e bujqësisë, e zhvillimit ekonomik dhe e mirëqenies së shoqërisë sonë. Me punën, përkushtimin dhe qëndrueshmërinë e tyre, ato kontribuojnë çdo ditë në prodhimin vendor, sigurinë ushqimore, ruajtjen e traditave dhe mirëqenien e familjeve e komuniteteve të tyre. Megjithatë, kontributi i grave në bujqësi duhet të shoqërohet me më shumë mundësi, me më shumë mbështetje konkrete dhe qasje më të lehtë në investime, teknologji moderne dhe tregje”, tha Rafuna. Në këtë panair, ekspozimi i prodhimeve u bë nga vetë gratë fermere dhe sipërmarrëse të vogla, të cilat ndanë përvojat e tyre, sfidat e përditshme dhe përpjekjet për tregtimin e mallrave vendore. Fermerja Ardita Kastrati foli hapur për pengesat me të cilat përballet gjatë ushtrimit të veprimtarisë së saj. “Ka vështirësi, ne jemi pak të varur prej kushteve atmosferike, vështirësitë janë në çdo lloj pune qe e bene por ne bujqësi janë me te shpeshta”, u shpreh Kastrati. Një tjetër pjesëmarrëse, Njomza Bata, tregoi se sapo ka hyrë në botën e biznesit dhe se këto aktivitete janë dritare e mirë promovimi për produktet e saj të reja. “Ja kemi nis qetash jemi fillestare, qe një vit jo me shume, është fillimi i biznesit”, tha Bata. Ndërkaq, Ganimete Sejdiu, përfituese e një sere nga Komuna e Podujevës, theksoi rëndësinë e angazhimit në trajnime dhe përfitimit të granteve për lehtësimin e punës së saj të përditshme. “Jam përfituese e një sere 3 ari prej komunës së Podujevës”, përfundoi ajo.