Dramë në Indonezi: Trageti me pasagjerë kaplohet nga flakët, shpëtohet e gjithë skuadra dhe udhëtarët

Një ngjarje dramatike ka ndodhur të martën në Indonezinë perëndimore, ku trageti "KMP Batumandi" është përfshirë nga zjarri pak para se të ankorohej në portin Merak, por fatmirësisht të gjithë personat në bord kanë arritur të shpëtojnë shëndoshë e mirë. Autoritetet vendase dhe ekipet e emergjencës kanë ndërhyrë menjëherë për të evakuuar të gjithë pasagjerët dhe anëtarët e ekuipazhit, ndërkohë që një shtëllungë e madhe tymi të zi ka mbuluar zonën pranë provincës Banten. Anija ishte nisur nga porti i Bakauheni, në jug të Sumatrës, rreth orës 14:52. Vetëm dy orë më vonë, personeli në breg ka konstatuar shfaqjen e flakëve në pjesën e prapme të mjetit lundrues, ndërsa operatori ka konfirmuar se i gjithë procesi i evakuimit është përmbyllur brenda një periudhe prej një ore. Një nga udhëtarët ka rrëfyer momentet e tmerrit, duke treguar se tymi ishte bërë aq i dendur sa vështirësonte frymëmarrjen, ndërkohë që nga tavani kishte nisur të rridhte naftë. Derisa autoritetet portuale, policia dhe agjencitë e kërkim-shpëtimit vijojnë operacionet në terren për menaxhimin e plotë të situatës, shkaqet e rënies së zjarrit mbeten ende të panjohura.