Mbështetje e fuqishme nga diaspora: Shqiptarët në Austri ngrihen në mbrojtje të vlerave të UÇK-së

Deputeti i Partisë Demokratike të Kosovës, Arian Tahiri, ka ndarë me ndjekësit e tij në rrjetet sociale momente nga një tubim i organizuar nga bashkatdhetarët tanë në qytetin e Grazit në Austri, ngjarje kjo që i ka kushtuar vëmendje të veçantë mbështetjes së Ushtrisë Çlirimtare të Kosovës dhe ish-krerëve të saj. Nëpërmjet një postimi publik, ligjvënësi Tahiri ka vënë në dukje se komuniteti shqiptar në Graz, në një linjë me diasporën mbarëeuropiane dhe qytetarët brenda trojeve shqiptare, po përcjell një mesazh të qartë bashkimi dhe solidariteti për luftën e drejtë të UÇK-së. “Një komb, një zë, një qëndresë! Në Graz të Austrisë, ashtu si në mbarë Evropën dhe në të gjitha trojet shqiptare, shqiptarët bashkë për UÇK-në dhe çlirimtarët tanë! UÇK-ja përgjithmonë!”, ka theksuar ai në mesazhin e tij. Në materialin filmik të shpërndarë nga vetë deputeti, shihet qartë entuziazmi i të pranishmëve, të cilët njëzëri kanë brohoritur thirrje në mbështetje të Ushtrisë Çlirimtare të Kosovës, duke refuzuar në këtë mënyrë zhvillimet dhe vendimet e fundit të gjykatës në Hagë.