Protesta në Prishtinë: Mesazh i qartë për ekzekutivin, protestuesit kërkojnë miratimin e ligjit për Dhomat e Specializuara

Në natën e nëntë të tubimit “Jo në emrin tim”, qytetarët e mbledhur në sheshin “Skënderbeu” në kryeqytet kanë ndërmarrë një hap simbolik, duke drejtuar dritat e reflektorëve nga ndërtesa e Qeverisë së Kosovës. Përmes këtij gjesti, pjesëmarrësit në protestë kanë shfaqur hapur kërkesën e tyre që institucionet të procedojnë me votimin e Projektligjit për ndryshimin dhe plotësimin e Ligjit për Dhomat e Specializuara. “Reflektorët po i kthejmë nga objekti i Qeverisë. Votojeni ligjin për Dhomat e Specializuara, durimi ynë po mbaron”, deklaroi Çlirim Haziri, organizator i kësaj proteste. Këto tubime po organizohen çdo mbrëmje në Prishtinë, si reagim ndaj vendimit të Gjykatës Speciale në Hagë ndaj ish-udhëheqësve të Ushtrisë Çlirimtare të Kosovës. Ndërkaq, për ditën e nesërme është planifikuar mbledhja e Kryesisë së Kuvendit, e cila në rendin e ditës ka të caktuara çështje të tjera.