Përballja historike: Messi dhe Ronaldo mes legjendave për çmimin “Topi i Artë i të gjitha kohërave”

Lionel Messi dhe Cristiano Ronaldo do të jenë protagonistët kryesorë në një garë madhështore për një çmim ekskluziv, i cili organizohet me rastin e 70-vjetorit të ndarjes së parë të trofeut prestigjioz "Topi i Artë". Organizatorët kanë zyrtarizuar listën e plotë të pretendentëve për njohjen speciale “Topi i Artë i të gjitha kohërave”, një nismë ku vendimtare do të jetë vota e publikut për të përzgjedhur sezonin ku një fitues i këtij çmimi ka dhuruar paraqitjen më të jashtëzakonshme individuale në historinë e tij. Në këtë konkurrencë prestigjioze figurojnë disa nga ikonat më të ndritura të futbollit botëror, ku përveç dy yjeve modernë, pjesë e listës janë edhe legjenda si Johan Cruyff, Michel Platini dhe Ronaldo Nazario. Sulmuesi argjentinas Lionel Messi është përfshirë në listë për tetë sezone të ndryshme në të cilat është kurorëzuar më parë me këtë çmim: 2009, 2010, 2011, 2012, 2015, 2019, 2021 dhe 2023. Nga ana e tij, ylli portugez Cristiano Ronaldo kandidojë me pesë vite të karrierës së tij: 2008, 2013, 2014, 2016 dhe 2017. Po ashtu, pjesë e kësaj gare elitare janë edhe emra të shquar të së kaluarës, ku veçohen Johan Cruyff me vitet 1971, 1973 dhe 1974; Michel Platini me vitet 1983, 1984 dhe 1985; si dhe holandezi Marco van Basten për edicionet 1988, 1989 dhe 1992. Lista plotësohet nga personalitete të tjera të mëdha të fushës së blertë, si Ronaldo Nazario për vitet 1997 dhe 2002, Franz Beckenbauer (1972 dhe 1976), Alfredo Di Stéfano (1957 dhe 1959), Karl-Heinz Rummenigge (1980 dhe 1981), si dhe anglo-saksoni Kevin Keegan për vitet 1978 dhe 1979. Tifozët anembanë botës do të kenë mundësi të mbështesin futbollistin e tyre të zemrës përmes votimit që do të qëndrojë i hapur deri më 27 tetor, në mesnatë. Çdo votë do të ketë një kosto simbolike prej një euroje, ndërsa fituesit e këtij organizimi pritet të shpallen zyrtarisht më 28 tetor. Ndërkohë, ceremonia madhështore e këtij evenimenti është parashikuar të mbahet më 26 tetor në sallën e njohur "Palladium" në Londër. Kujtojmë se "Topi i Artë" u nda për herë të parë në vitin 1956, ndërsa edicioni i ardhshëm shënon plot shtatë dekada nga themelimi i këtij çmimi historik për futbollin botëror.